پانی کس اندر برق بے تابانہ چمکی؛ موجیں اٹھیں اور آپس میں ٹکرا گئیں۔

گلستان جنت سے خوشبو آئی اور اس کے ساتھ ہی اس درویش مصر کی روح ظاہر ہوئی۔

اس کے سوز سے کچنر کے سینے کے اندر جو پتھر کا دل تھا؛ وہ بھی یوں پگھل گیا جیسے صدف کے اندر گوہر پگھل جائے۔

مہدی نے کہا: 'اے کچنر اگر نظر رکھتا ہے؛ تو خاک درویش کا انتقام دیکھ۔

آسمان نے تیری لاش کو قبر بھی نہ دی تو سمندر کے آب شور میں غرق ہوا۔

پھر اس کے گلے میں آواز اٹک گئی اور اس کے لب سے آہ جگر تاب نکلی۔

اس نے کہا، اے روح عرب بیدار ہو اور اپنے بزرگوں کی طرح نئے زمانے تخلیق کر۔

اے فواد (مصر) ! اے فیصل (عراق) ! اے ابن سعود! کب تک دھنوئیں کی مانند اپنے ارد گرد ہی پیچ کھاتے رہو گے۔

وہ سوز جو سینوں سے جا چکا ہے اسے دوبارہ زندہ کرو اور گیا ہوا زمانہ دنیا میں پھر سے واپس لاؤ۔

اے سر زمین مکہ ایک اور خالد پیدا کر، ایک بار پھر توحید کا گیت گا۔

تیرے صحرا کی کھجوریں اور بلند ہوں، کیا تیرے اندر سے کوئی اور فرعون پیدا نہیں ہو سکتا۔

اے مشک فام مومنوں کی دنیا (افریقہ ) مجھے تیری طرف سے خوشبو ئے مدام آتی ہے۔

کب تک آگے بڑھنے کے ذوق کے بغیر زندگی بسر کرو گے؛ کب تک اپنی تقدیر غیروں کے ہاتھ میں دئیے رہو گے۔

کب تک اپنا مقام حاصل نہ کرو گے؛ میری ہڈیاں سمندر کے اندر بانسری کی طرح نالاں ہیں۔

مصیبت سے ڈرتے ہو؟ رسول پاک (صلعم) کی یہ حدیث نہیں سنی کہ 'مرد کے لیے روز بلا روز صفا ہے'۔

ساربان دوست مدینہ منوّرہ پہنچے ہوئے ہیں اور ہم اس شہر سے دور نجد میں ہیں؛ وہ حدی خواں کہاں ہے جو ہمارے ناقے کو وجد میں لا کر (جلد وہاں پہنچا دے)۔

بارش ہو چکی ہے زمین سے سبزہ اگ آیا ہے؛ ہو سکتا ہے کہ اونٹنی کی رفتار سست ہو جائے۔

میری جان درد جدائی سے نالاں ہے؛ تو وہ راستہ اختیار کر جہاں سبوء کم ہو۔

ناقہ سبزہ (کھانے میں) مست ہے اور میں دوست (صلعم) کے خیال میں مست ہوں۔اے ساربان ناقہ کی مہار تیرے ہاتھ میں ہے اور میری مہار محبوب (صلعم) کے ہاتھ میں ہے۔

(بارش کے) پانی نے صحرا میں راستے بنا لیے ہیں؛ کھجور کے درختوں کے پتّے دھل چکے ہیں۔

دیکھ وہ دو آہو ایک دوسرے کے پیچھے ٹیلے کی چوٹی سے نیچے آ رہے ہیں۔

ایک لمحے کے لیے انہوں نے چشمہء صحرا سے پانی پیا، پھر مسافر کی جانب دیکھا۔

نمی کی وجہ سے صحرا کی ریت ریشم کی مانند ہے، اونٹنی پر سفر گراں نہیں۔

آسمان پر تیتر کے پر کی مانند بدلیوں کے حلقے ہیں، میں بارش سے ڈرتا ہوں؛ کیونکہ میری منزل دور ہے۔

ساربان دوست مدینہ منوّرہ پہنچے ہوئے ہیں اور ہم شہر سے دور نجد میں ہیں ؛ وہ حدی کہاں ہے جو ہمارے ناقہ کو وجد میں لا کر (جلد وہاں پہنچا دے)۔