میں ہزاروں کاخ و کو سے گزر کر ایک فراخ میدان میں پہنچا جو شہر کے کنارے پر تھا۔

اس میدان میں عورتوں اور مردوں کا ہجوم تھا ؛ اور ان کے درمیان ایک عورت کھڑی تھی جس کا قد ناروان کی طرح بلند تھا۔

اس کا چہرہ روشن تھا مگر روحانیت کے نور کے بغیر اس کی گفتگو پر معنی گراں تھے (بے معنی تھے)۔

اس کے الفاظ بے سوز اور اس کی آنکھ بے نم تھی؛ اور وہ آرزو کے سرور سے نا آشنا تھی۔

اس کا سینہ جوش جوانی سے خالی تھا؛ وہ اندھی تھی اور اس کی صورت آئینہ کے لیے ناقابل قبول تھی (بدصورت تھی)۔

وہ عشق اور آئین عشق سے نا واقف تھی؛ وہ ایسے ممولے کی مانند تھی جسے شاہین عشق رد کر چکا تھا۔

اس حکیم نکتہ دان نے ہمیں بتایا ' یہ دوشیزہ مریخیوں میں سے نہیں ہے۔

وہ سادہ، آزاد اور مکر و فریب کے بغیر تھی؛ فرز مرز (ابلیس) نے اسے فرنگ سے اغوا کیا تھا۔

پھر اسے نبوّت کے کام میں پختہ کر کے اس عالم میں لا ڈالا۔

یہ کہنے لگی میں آسمان سے نازل ہوئی ہوں اور میری دعوت آخرالزمان ہے۔

یہ مرد و زن کے مقام کی بات کرتی ہے؛ اور بدن کے اسرار کھلم کھلا بیان کرتی ہے۔

اس آخر الزمان کے نزدیک زندگی کی تقدیر کیا ہے؛ میں اسے اہل زمین کی زبان میں بیان کرتا ہوں۔