آپ لوگ مومنوں کے مقام (جنت) سے کیوں دور اور مہجور رہتے ہیں؟

وہ مرد آزاد (جو) خوب و نا خوب کو پہچانتا ہے؛ اس کی روح بہشت کے اندر نہیں سما سکتی۔

ملّا کی جنت ، شراب، حور اور غلمان کی جنت ہے؛ آزاد لوگوں کی جنت سیر دوام ہے۔

ملّا کی جنت میں کھانا، پینا ، سونا اور راگ سننا ہے؛ عاشق کی جنت موجودات کا نظارہ ہے۔

ملّا کا حشر بانگ صور و شق القبر ہے؛ عشق شور انگیز خود صبح قیامت ہے۔

علم کا دار و مدار خوف و امید پر ہے ؛ عشق بیم و رجا سے بے نیاز ہے۔

علم کائنات کے جلال سے خوف زدہ رہتا ہے؛ عشق حسن کائنات میں محو رہتا ہے۔

علم کی نظر ماضی و حال پر ہے؛ عشق جو دیکھتا ہے وہی کہتا ہے۔

علم نے جبر کے قانون کو تسلیم کر رکھا ہے؛ اس کے لیے سوائے جبر پر صبر کے اور کوئی چارہ نہیں۔

عشق آزاد، غیّور اور نا صبور ہے اور موجودات کا نظارہ کرنے میں دلیر ہے۔

ہمارا عشق شکوہ و شکایت سے نا آشنا ہے؛ اس کا گریہ مستی کا گریہ ہے۔

ہمارا دل مجبور مجبور نہیں ہے؛ نگاہ حور کے تیر سے ہمارے دل زخمی نہیں ہوتے۔

فراق ہماری جان کو راس آتا ہے؛ کیونکہ وہ ہماری آتش شوق کو اور بھڑکا دیتا ہے۔

خلش کے بغیر زندہ رہنا کوئی زندگی نہیں؛ آتش زیر پا رہنا ہی زندگی ہے۔

اس طرح زندہ رہنا ہی خودی کی تقدیر ہے؛ اس تقدیر سے خودی کی تعمیر ہوتی ہے۔

شوق بے خود سے زرّہ بھی مہر بن جاتا ہے اور اس کے سینے میں نو آسمان سما جاتے ہیں۔

جب شوق جہان پر شبخون مارتا ہے؛ پل بھر کی زندگی رکھنے والوں کو ہمیشہ کی زندگی عطا کر دیتا ہے۔

گردش تقدیر موت اور زندگی ہے؛ کوئی نہیں جانتا کہ گردش تقدیر کیا ہے؟

جو شخص تقدیر کا ساز و سامان رکھتا ہے؛ اس کی قوّت سے ابلیس و مرگ بھی ڈرتے ہیں۔

جبر، صاحب ہمت شخص کا دین ہے؛ جواں مردوں کا جبر ان کی قوّت کے کمال کے سبب ہے۔

پختہ شخص جبر سے پختہ تر ہو جاتا ہے ؛ نا پختہ کے لیے جبر آغوش قبر ہے۔

خالد (رضی) کے جبر نے ایک دنیا کو تہ و بالا کر دیا ؛ ہمارے جبر نے ہمیں جڑ سے اکھاڑ دیا۔

تسلیم و رضا جوانمردوں کا کام ہے؛ یہ قبا کمزوروں کے بدن پر راست نہیں آتی۔

تو جو پیر روم کے مقام سے آکاہ ہے ؛ کیا تو نے ان کے یہ اشعار نہیں پڑھے۔

'حضرت با یزید بسطامی (رحمتہ) کے زمانے میں ایک یہودی تھا؛ ایک نیک بخت مسلمان نے اس سے کہا۔

بہتر ہے کہ تو ایمان لے آئے تا کہ دنیا میں سرداری اور آخرت میں نجات پائے۔

اس نے کہا ، اے ارادتمند اگر ایمان وہ ہے جو حضرت با یزید رکھتے تھے۔

تو مجھ میں اس کی تاب و تواں نہیں ؛ وہ (میری) جان کی کوشش سے بڑھ کر ہے'۔

ہمارا کام امید و خوف کے علاوہ اور کچھ نہیں ہر کسی میں تسلیم و رضا کی ہمت نہیں۔

اے وہ شخص جو یہ کہتا تھا یہ ہونا تھا، یہ ہو کے رہا ؛ کام ایک آئین کے پابند تھے اس لیے ایسا ہوا۔

تو تقدیر کے معنی نہیں سمجھا؛ نہ تو خودی کو سمجھا اور نہ اللہ تعالے کی شان کو۔

مرد مومن اللہ تعالے کے ساتھ راز و نیاز رکھتا ہے اور کہتا ہے ہم نے آپ سے موافقت کی آپ ہم سے موافقت کریں۔

مرد مومن کا عزم حق تعالے کی تقدیرات کا خلاق ہے جنگ کے دن اس کا تیر اللہ تعالے کا تیر بن جاتا ہے ('و ما رمیت اذ رمیت' کی طرف اشارہ ہے)۔

کم نگاہوں نے فتنے برپا کر دئے (تجھ جیسے) بندہ حق کو سولی پر لٹکا دیا۔ تجھ پر وجود کے اسرار آشکار ہیں ؛ بتا تو سہی آخر تیر ا گناہ کیا تھا؟

میرے سینے کے اندر بانگ صور تھی؛ میں نے ایک ایسی قوم دیکھی جس کی سوچ اسے قبر کی طرف لی جا رہی تھی۔

تھے وہ مومن لیکن ان کی خو بو کافروں جیسی تھی؛ لاالہ پڑھتے تھے، مگر اپنی قوّت کے منکر تھے۔

وہ کہتے تھے کہ روح نقش باطل ہے کیونکہ وہ بدن کے سا تھ وابستہ ہے۔

میں نے اپنے اندر زندگی کی آگ روشن کی؛ مردہ لوگوں کو زندگی کے اسرار بتائے۔

(میں نے ان سے کہا کہ) اس جہان کی بنیاد خودی پر رکھی گئی ہے؛ یہاں دلبری کے ساتھ قاہری کی بھی امیزش ہے۔

کہیں خودی ظاہر ہے کہیں مستور ؛ مگر ہماری نگاہ اس کی تاب نہیں لا سکتی۔

خودی کے نور کے اندر کئی قسم کی آگ پوشیدہ ہے؛ اس کے طور سے کائنات میں رنگا رنگ جلوے ہیں۔

اس دیر کہن میں ہر دل ہر لمحہ در پردہ خودی سے سرگرم سخن ہے۔

جو خودی کی آگ سے حصّہ نہیں پاتا وہ اس جہان میں اپنے آپ سے نا آشنا رہتا ہوا رخصت ہوتا ہے۔

ہند و ایران خودی کے نور سے آشنا ہیں؛ لیکن وہ لوگ کم ہیں جو اس کی نار سے آگاہ ہوں۔

میں نے خودی کے نور و نار دونوں کی خبر دی؛ تو بندہ محرم ہے دیکھ لے میرا گناہ کیا تھا۔

آگاہ رہ جو کچھ میں نے کہا تھا ، تو بھی وہی کہہ رہا ہے؛ تو بھی ایک مردہ قوم میں بانگ صور پھونک رہا ہے۔

صاحب جنون بندے کے گناہ سے ایک نئی کائنات وجود میں آتی ہے۔

حد سے بڑھے ہوئے شوق سارے پردے ہٹا دیتا اور قدیم جہان کا خاتمہ کر دیتا ہے۔

پھر وہ بالاخر دار و رسن کا انعام پاتا ہے ؛ وہ کوئے حبیب سے زندہ واپس نہیں آتا۔

اب تو شہر و صحرا میں منصور کے جلوے دیکھ تاکہ تجھے یہ گمان نہ ہو کہ وہ دنیا سے رخصت ہو چکا ہے۔

وہ اپنے زمانے کے ضمیر کے اندر پوشیدہ ہے؛ معلوم نہیں کہ وہ اس کی خلوت میں کیسے سما گیا؟

آپ کو درد جستجو عطا ہوا ہے؛ مجھے اپنے ایک شعر کے معنی تو بتائیے۔ 'قمری کف خاکستر و بلبل قفس رنگ؛ اے نالہ نشان جگر سوختہ کیا ہے؟'

وہ نالہ جو سوز جگر سے اٹھا ہے؛ میں نے ہر کہیں اس کی تاثیر مختلف دیکھی۔

قمری اس کی تاثیر سے سر تا پا سوختہ ہے؛ بلبل نے اس سے مختلف رنگ حاصل کئے ہیں۔

اس نالے کے اندر حیات کے آغوش میں موت ملتی ہے ایک، ایک ہی لمحہ ادھر زندگی ہے ادھر موت۔

ایسا بھی رنگ ہے کہ اس سے کئی قسم کے رنگ پیدا ہوتے ہیں اور ایسے بھی رنگ ہے جو بے رنگی کی طرف لی جاتا ہے۔

تو نہیں جانتا کہ یہ دنیا مقام رنگ و بو ہے، یہاں ہر دل اپنی ہا و ہو کے مطابق حصّہ پاتا ہے۔

یا رنگ میں اور یا بے رنگی اختیار کر تاکہ سوز جگر کا نشان پا سکے۔

اس نیلی فضا میں سینکڑوں جہان موجود ہیں؛ کیا ہر جہان کے (اپنے ) اولیا و انبیا ہیں۔

اس ہستی و عدم کو غور سے دیکھ یہاں پے بہ پے نئے جہان وجود میں آ رہے ہیں۔ جہاں کہیں ہنگامہء عالم ہے وہاں رحمتہ العالمین ( حضور اکرم صلعم) بھی ہیں۔

وضاحت سے کہئے کیونکہ میرا فہم نا رسا ہے۔

یہ بات بھول کر کہنا خطا ہے۔

کیا اہل دل کی گفتگو بے حاصل ہے۔

(اس) نکتے کو الفاظ میں بیان کرنا مشکل ہے۔

آپ تو سوز طلب سے سر تا پا آتش ہیں ؛ تعجب کی بات ہے کہ آپ بھی سخن پر غالب (نہیں)۔

تخلیق کرنا ، ہر وجود کی استعداد مقرر کرنا اور اس کے اندر آگے بڑھنے کا جذبہ رکھنا – یہ ابتدا ہے اور مقام رحمتہ العالمین انتہا ہے۔

میں ابھی تک معنی کا چہرہ نہیں دیکھ سکا ؛ اگر تو آتش رکھتا ہے تو میرے (افکار پریشان کو) جلا دے۔

تو بھی میری طرح اسرار شعر کا جاننے والا ہے یہ بات شعر میں بیان نہیں کی جا سکتی۔

شاعر محض سخن آرائی کرتے ہیں؛ یہ ایسے کلیم ہیں جن کے پاس ید بیضا نہیں۔

جو کچھ تو مجھ سے چاہتا ہے یہ کافری ہے اور شاعری سے ماورا ہے۔

جہاں کہیں تو جہان رنگ و بو دیکھتا ہے؛ ایسا جہان جس کی خاک سے آرزو پھوٹتی ہو۔ یا تو اس کی قدر و قیمت نور مصطفے (صلعم) سے ہے یا وہ ابھی تک مصطفے (صلعم) کی تلاش میں ہے۔

گرچہ یہ بات پوچھنی خطا ہے مگر میں آپ سے پوچھتا ہوں کہ وہ جوہر جس کا نام مصطفے (صلعم) ہے اس کا راز کیا ہے؟ وہ آدم ہے یا جوہر جو گاہے گاہے وجود میں آتا ہے؛ (انبیا کی ارواح کا درجہ باقی ارواح سے افضل ہے اور حضور اکرم (صلعم) کی روح خاص الخواص ہے؛ جو سب سے پہلے تخلیق کی گئی۔یہاں انبیا کی بعثت کی طرف اشارہ ہے)۔

آپ (صلعم) کے سامنے زمانہ سر بسجود ہے؛ لیکن آپ (صلعم) نے خود اپنے آپ کو عبدہ کہا ہے۔

کا مقام تیرے فہم سے بالاتر ہے کیونکہ وہ آدم بھی ہے اور جوہر بھی۔عبدہ

اس کا جوہر نہ عرب سے ہے نہ عجم سے؛ ہے وہ آدم مگر اس کا وجود آدم سے پہلے ہے (حضور ( صلعم) نے فرمایا میں اس وقت بھی موجود تھا جب آدم ابھی پانی اور مٹی کے درمیان تھا۔

عبدہ سے تقدیر وں کو بنانے والا ہے اس کے اندر ویرانے بھی ہیں اور تعمیرات بھی۔

عبدہ مومنوں کی جان میں افزودگی کا باعث بنتا ہے؛ اور کفار کی جان کھینچ لیتا ہے۔

عبد اور ہے، اور عبدہ اور جیز ہے؛ ہم سرا پا انتظار ہیں اور اس کا انتظار کیا جاتا ہے (معراج کی طرف اشارہ ہے)۔

عبدہ زمانہ ہے اور زمانہ عبدہ سے پیدا ہوتا ہے؛ ہم سب مختلف (تعصبات کے) رنگوں میں رنگے ہوئے ہیں اور وہ بے رنگ و بو ہے۔

اگرچہ عبدہ کی ابتدا ہے مگر اس کے (ارتقا) کی کوئی انتہا نہیں ؛ عبدہ کے صبح و شام ہمارے صبح و شام نہیں۔

عبدہ سے کے سرّ سے کوئی آگاہ نہیں؛ صرف عبدہ ہی الا اﷲ کا سرّ ہے۔

لاالہ تیغ ہے اور اس کی دھار عبدہ ہے؛ فاش تر کہیں تو وہ خود عبدہ ہی ہے۔(آیک حدیث قدسی کے مطابق بندہ نوافل یعنی زائد عبادت کے ذریعے اللہ تعالے کا قرب حاص کرتا چلا جاتا؛ یہاں تک کہ اللہ تعالے اس کی بصارت بن جاتے ہیں، اس کے ہاتھ بن جاتے ہیں۔

عبدہ سے کائنات کا معیار ہے؛ وہی کائنات کا راز درون ہے۔

ان دو بیت سے بات واضح نہیں ہوتی جب تک تو مقام 'ما رمیت ' کو نہ سمجھے۔

اے زندہ رود بات چیت چھوڑ؛ اور (عبد ہ کے) وجود کے اندر گم ہو جا۔

میں نہیں سمجھ سکا کہ عشق کا کیا کام ہے؟ اگر ذوق دیدار ہے تو دیدار کیا ہے؟

نبی آخر زمان (صلعم) کے دیدار کے معنی یہ ہیں کہ اپنے اوپر آپ (صلعم) کا حکم جاری کیا جائے۔

دنیا میں جناب رسول پاک (صلعم) کی سنت کے مطابق زندگی بسر کر تاکہ تو بھی ان (صلعم) کی مانند انس و جان کا محبوب بن جائے۔

پھر اپنے آپ کو دیکھ ، یہی آپ (صلعم) کا دیدار ہے؛ آپ (صلعم) کی سنت ہی آپ (صلعم) کے اسرار کا ایک سرّ ہے۔

کائنات کے مالک (اللہ تعالے) جن کے حکم کے بغیر سورج چاند گردش نہیں کرتے ؛ ان کا دیدار کیا چیز ہے؟

پہلے اللہ تعالے کے نقش کو اپنی جان پر ثبت کرنا (اللہ تعالے کے احکام کو اپنے اوپر نافذ کرنا) پھر انہیں جہان میں نافذ کرنا۔

جب اپنی جان پر ثبت کیا ہوا نقش حق تعالے دنیا میں مکمل ہو جائے تو اللہ تعالے کا دیدار عام ہو جاتا ہے۔

مبارک ہے وہ شخص جس کی ایک 'ہو' سے نو آسمان اس کی گلی کا طواف کرنے لگتے ہیں۔

افسوس ہے اس درویش پر جس نے ایک بار 'ہو' کی آواز نکالی مگر پھر اپنے لب بند کر لیے اور اپنی سانس روک لی۔

اس نے اللہ تعالے کے حکم کو دنیا میں نافذ نہ کیا ؛ جو کی روٹی تو کھائی مگر حیدر کرّار (رضی) کا سا عمل اختیار نہ کیا۔

اس نے خانقاہ ڈھونڈی مگر معرکہء خیبر سے دور رہا؛ راہبی اختیار کی مگر سلطانی نہ دیکھی۔

اگر تو اپنے اندر نقش حق رکھتا ہے تو جہان کو شکار کر؛ تقدیر بھی تیری تدبیر کے مطابق راستہ اختیار کرے گی۔

عصر حاضر تجھ سے نبرد آزمائی چاہتا ہے؛ اس کافر پر اللہ تعالے کا نقش ثبت کر دے۔

اللہ تعالے کے نقش کو دنیا میں ثبت کیا گیا ہے ؛ مگر میں نہیں جانتا کہ اسے کیسے ثبت کیا گیا ہے؟

یا اسے دلبری کے زور سے ثبت کیا گیا ہے، یا قاہری کے زور سے۔ چونکہ اللہ تعالے کی شان دلبری (رحمت) میں زیادہ واضح ہوتی ہے اس لیے دلبری قاہری سے اونچا درجہ رکھتی ہے۔

اے اسرار شرق کے راز دان! ایک بار پھر بیان کر کہ زاہد و عاشق کے درمیان کیا فرق ہے؟

زاہد دنیا میں اجنبی ہے اور عاشق جنت میں اجنبی ہے۔

کیا معرفت کی انتہا اپنی ہستی مٹا دینا اور فنا کے اندر آسودگی حاصل کرنا ہے؟

یاروں کی مستی کا باعث ان کا جام خالی ہونا ہے؛ اپنے آپ کو مٹا دینا معرفت سے نا آشنا ہونا ہے۔ تو جو فنا میں اپنا مقصود ڈھونڈتا ہے عدم کو نہیں پا سکتا (عدم موجود کی ضد ہے)۔

ابلیس جس نے اپنے آپ کو آدم سے بہتر شمار کیا اب اس کے خم و جام میں نہ شراب باقی ہے نہ تلچھٹ۔ ہماری مشت خاک آسمان کی بلندیوں کو چھو رہی ہے؛ اس بے سر و سامان کی آگ (آج) کہاں ہے۔

اس خواجہء اہل فراق کی بات نہ کر، وہ ازل سے تشنہ کام ہے؛ اگرچہ اس کا پیالہ خونیں شراب سے پر ہے۔

ہم جہول ہیں وہ ہستی و نیستی سے واقف ہے؛ اس کے انکار نے ہم پر یہ راز واضح کیا۔

اٹھنے کی لذت گرنے ہی سے ہے؛ بڑھنے کا لطف کھو دینے کے درد ہی سے ہے۔

اس کی آگ میں جلنا عاشقی ہے؛ اور اس کی آگ کے بغیر جلنا نہ جلنے کے برابر ہے۔

کیونکہ وہ عشق اور عبادت میں آدم سے قدیم تر ہے اس لیے آدم اس کے اسرار سے نا محرم ہے۔

تقلید کا پیرہن چاک کر تاکہ اس سے توحید سیکھے۔

روح کی سلطنت آپ کے زیر نگیں ہے؛ تھوڑی دیر اور ہمیں اپنی صحبت سے نوازیئے۔

ہم کسی ایک مقام کے ساتھ موافقت نہیں کر سکے؛ ہم سرا پا ذوق پرواز ہیں اور بس۔ ہر لمحہ دیکھنا اور تڑپتے رہنا ہمارا کام ہے؛ ہم بغیر پر و بال کے اڑتے رہتے ہیں۔