دریائے کاویری ذرا آہستہ چل شاید تو مسلسل رواں رہنے سے تھک چکا ہے۔

تو ساری عمر کوہستان میں فریاد کناں رہا؛ تو نے اتنا راستہ اپنی پلکوں سے کھودا ہے۔

میری نظروں میں تو جیحوں اور فرات سے خوشتر ہے؛ تیرا پانی دکن کے لیے آب حیات ہے۔

ہاں وہ شہر جو تیری آغوش میں تھا؛ اس شہر کا حسن شیریں تیرے آب رواں کا مرہون منت تھا۔

اگرچہ تو بوڑھا ہو چکا ہے مگر تیرا شباب پیچ و تاب و رنگ و آب اسی طرح ہے۔

تیری موج نے صرف گوہر کا ایک ہی دانہ پیدا کیا ہے (اپنی طرف اشارہ ہے) ؛ تیری لہریں اسی طرح تا ابد شوریدہ رہیں۔

اے وہ دریا جس کی (لہروں ) کا ساز و سوز زندگی پیدا کر رہا ہے؛ کیا تو جانتا ہے کہ کون تجھ سے ہمکلام ہے؟

تو جانتا ہے کہ یہ وہ شخص ہے تو جس کی سطوت کا طواف کرتا رہا؛ اور جس کی حکومت کا آئینہ دار رہا۔

جس کی تدبیر نے صحراؤں کو بہشت بنا دیا ؛ جس نے اپنا نقش (حیات) اپنے خون سے رقم کیا۔

جس کا مرقد آج بھی سینکڑوں آرزوؤں کا مرجع ہے؛ تیرا موجوں کا اضطراب اسی کے خون کے باعث ہے۔

وہ جس کی گفتار سراپا کردار ہے؛ سارا مشرق سو رہا تھا مگر وہ بیدار تھا۔

میں اور تو دریائے زندگی کی موجیں ہیں اور یہ کائنات ہر لحظہ نیا رنگ بدلتی ہے۔

زندگی بھی ہر لمحہ نیا انقلاب چاہتی ہے چونکہ وہ نئے عالم کی جستجو میں رہتی ہے۔

ہر وجود کا تانا بانا اس کے ماضی سے ہے؛ یہ سارا ذوق پیدائی فنا ہی کے سبب سے ہے۔

راستے بھی سفر میں مسافروں کی مانند ہیں ؛ ہر کہیں حضر (قیام) ظاہر اور سفر پوشیدہ ہے۔

کاروان ہو، ناقہ ہو، صحرا ہو یا درخت ہو؛ جو کچھ تجھے نظر آتی ہے وہ سب آرزو ئے سفر میں فریاد کناں ہے۔

چمن میں پھول ایک لمحے کا مہمان ہے اس کا رنگ اور آب و تاب بس ایک نفس کی نمود ہے۔

موسم گل ؟ ماتم بھی ہے اور دعوت عیش بھی ؛ کلی اس کی آغوش میں اور پھول کی نعش اس کے دوش پر۔

میں نے گل لالہ سے کہا تھوڑی دیر اور جلتا رہ؛ اس نے جواب دیا شاید تو نے ابھی تک ہمارا راز نہیں پایا۔

وجود کی تعمیر خس و خاشاک سے ہے؛ نمود کا انجام سوائے حسرت کے اور کچھ نہیں۔

سارے ہست و بود میں آنا چاہتا ہے؟ نہ آ۔عدم سے وجود میں آنا چاہتا ہے؟ نہ آ۔

اور اگر آنا ہے تو شرر کی مانند اپنے آپ کو فنا نہ کر بلکہ کسی خرمن کی تلاش میں آوارہ رہ۔

اگر تو سورج کی سی چمک دمک رکھتا ہے تو آسمان کی وسعتوں میں قدم رکھ۔

پہاڑ ، صحرا، مرغزار ، گلشن بلکہ دریا کی تہ میں موجود مچھلیوں کو بھی جلا دے۔

اگر تو ایسا سینہ رکھتا ہے جو تیر کا زخم برداشت کر سکے ؛ تو دنیا میں شاہین کی طرح زندہ رہ اور شاہین ہی کی موت مر۔

میں نے اللہ تعالے سے لمبی زندگی نہیں مانگی ؛ کیونکہ زندگی پیش کر دینے ہی میں اس کی بقا ہے۔

زندگی کی رسم و راہ و دین و آئین کیا ہے؟ شیر کا ایک لمحہ بھیڑ کے سو سال سے بہتر ہے۔

زندگی تسلیم و رضا (اللہ تعالے کے سامنے سرتسلیم خم کر دینا اور اللہ تعالے کی رضا میں راضی رہنا) سے استحکام پاتی ہے؛ موت صرف طلسم ، وہم ، اور نیرنگ ہے۔

اللہ تعالے کا بندہ شیر ہے اور آہو ؛ موت اس کے سینکڑوں مقامات میں سے ایک مقام ہے۔

وہ مرد کامل موت پر اس طرح جھپٹتا ہے جیسے شاہین کبوتر پر۔

(نفس کا) غلام ہر لمحہ موت کے خوف سے مرتا ہے؛ موت کے ڈر سے اس کی زندگی حرام ہو جاتی ہے۔

مگر اللہ تعالے کے بندے کی شان ہے موت اسے نئی زندگی عطا کرتی ہے۔

اللہ تعالے کے بندے کو اپنی فکر رہتی ہے ( میں احکام الہی کا پابند ہوں یا نہیں) اسے موت کی فکر نہیں : اللہ والوں کی موت ایک لمحے سے زیادہ نہیں۔

چھوڑ اس موت کو جو قبر سے موافقت اختیار کر لیتی ہے: کیونکہ وہ موت چوپایوں کی موت ہے۔

مرد مومن اللہ تعالے سے اس موت کا طالب رہتا ہے جو اسے خاک سے اوپر اٹھا دیتی ہے۔

وہ موت جو راہ شوق کی انتہا ہے؛ جو میدان شوق میں بلند کیا جانے والا آخری نعرہ ء تکبیر ہے۔

اگرچہ مومن ہر موت کر شکر سے قبول کرتا ہے مگر سیدنا حسین (رضی اللہ ) کی موت اور چیز ہے۔

دنیا کے پادشاہ لوٹ مار کے لیےجنگیں لڑتے ہیں؛ لیکن مومن کا جہاد آنحضور (صلعم) کی سنت کی پیروی ہے۔

مومن کی جنگ کیا ہے؟ اپنے محبوب ( حق تعالے) کی طرف ہجرت کر جانا؛ دنیا چھوڑ دینا اور کوئے دوست اختیار کر لینا۔

وہ ذات (صلعم) جنہوں نے قوموں کو عشق کی بات بتائی ، انہوں نے جہاد کو اسلام کی رہبانیت فرمایا۔

مگر اس نکتے کو شہید کے سوا اور کوئی نہیں سمجھتا کیونکہ وہ اس کو اپنا خون دے کر پاتا ہے۔