تو اپنے آپ سے پوشیدہ ہے، اپنے آپ کو دوبارہ پا لے، مسلمانی میں ایسا پردہ حرام ہے۔

کیا تو جانتا ہے کہ دین مصطفے (صلعم) کا راز کیا ہے ؟ یہ کہ اپنے آپ کو برملا دیکھنا بادشاہی ہے،

دین کیا ہے؟ اپنی شخصیت کے اسرار دریافت کرنا ۔ اپنے دیدار کے بغیر زندگی موت ہے۔

وہ مسلمان جو اپنے آپ کو دیکھ لیتا ہے وہ سمجھ لیتا ہے کہ وہ سارے جہان سے برتر ہے۔

ایسا مسلمان ہی ضمیر کائنات سے آگاہ ہوتا ہے، وہی لاموجود 'الاللہ ' کی تیغ بنتا ہے۔

مکان و لا مکان میں اسی کا غوغا ہے۔ یہ سارے آسمان اسی کی وسعت میں پھرتے ہیں۔

چونکہ مسلمان کا قلب اللہ تعالے کے اسرار میں سے ایک سرّ ہے اس لیے ایسے مسلمان پر افسوس ہے جو اپنے سے بے خبر ہے۔

اللہ تعالے کا بندہ پیغمبروں کا وارث ہے۔ وہ دوسروں کے جہان میں نہیں سماتا۔ (وہ اپنا جہان خود پیدا کرتا ہے)

چونکہ وہ نیا جہان پیدا کرتا ہے اس لیے پہلے اس پرانے جہان کو درہم برہم کر دیتا ہے۔

زندہ انسان غیر اللہ سے فراغت حاصل کر چکا ہے ، اس کے وجود کے اندر خودی کا چراغ روشن ہوتا ہے۔

خیر و شر کی جنگ میں وہ ثابت قدم رہتا ہے، ذکر اس کی شمشیر ہے اور فکر اس کا ڈھال۔

اس کی صبح آفتاب مشرق کی روشنی سے نہیں بلکہ اس بانگ اذان سے ہے جو اس کی جان کے اندر سے پیدا ہوتی ہے۔

اس جہان چار سو کے اندر اس کی فطرت جہات سے بالا تر ہے۔ وہ حریم ہے اور ساری کائنات اس کا طواف کرتی ہے۔

اس کی گرد راہ کا ہر ذرّہ آقتاب ہے، کتاب اللہ اس کے عروج پر گواہ ہے۔

اس کی صلاحیتیں ملّت کے ذریعے وسعت پذیر ہوتی ہیں۔ اس کی آنکھ کی روشنی ملّت ہی سے بڑھتی ہے۔

ذرا قرآن و سنت کے اندر گم ہو جا، پھر اے نادان اپنی طرف نگاہ ڈال (کہ تو کس حد تک اس معیار پر پورا اترتا ہے)۔

تو جہان میں آوارہ اور بے چارہ ہے، اپنی وحدت گم کر کے ٹکڑے ٹکڑے ہو چکا ہے۔

تیرے پاؤں میں غیر اللہ کی زنجیر پڑی ہے، تیری پیشانی پر غیر اللہ کی غلامی کا جو داغ ہے اس سے میرا دل داغ داغ ہے۔

اے سالار لشکر تو دشمنوں کی خفیہ سازشوں سے ہوشیار رہ اور اس بات سے ڈر کہ کہیں روح افغانی جاتی نہ رہے۔

میں تجھے مردان حق کی آگ سے گرماتا ہوں، تیرے سامنے پیر روم کا ایک نقطہ بیان کرتا ہوں۔

اللہ تعالے سے رزق مانگ، عیرے غیرے سے نہ مانگ ۔ مستی اللہ تعالے (کے عشق) سے مانگ ، منشیات سے حاصل نہ کر۔

نہ مٹی (مادیّت ) خرید، نہ مٹی کھا، نہ مٹی طلب کر، کیونکہ مٹی خوار ہے اور ہمیشہ زردرو رہتی ہے (اور اس کا طلبگار بھی ہمیشہ ذلیل و خوار رہتا ہے)۔

تو دل کی تلاش کر تا کہ ہمیشہ جواں رہے اور تیرا چہرہ حق تعالے کی تجلّی سے سرخ رہے۔

حق تعالے کا بندہ بن اور زمین پر گھوڑے کی طرح چل۔ جنازہ نہ بن کہ لوگ تجھے اپنی گردن پر اٹھاۓ پھریں ۔

نیلے آسمان کی گردش کا شکوہ نہ کر، آفتاب کے علاوہ اور کسی کے گرد نہ گھوم۔

ذوق و شوق کے مقام سے آگہی حاصل کر، ذرّے سے مہر و ماہ کا شکاری بن جا۔

(اپنے معیار سے ) جہان موجود کو پرکھ اور دنیا میں اپنی اہمیّت قائم کر۔

توحید ہی کائنات کی متاع ہے، اسی سے جہان میں زندگی ہے (جتنا کسی کا اللہ تعالے سے تعلق ہے اتنا ہی زندگی سے بہرہ ور ہے)۔

پرا نے رنگ و بو (روایات) کو چھوڑ، فرسودہ آرزوؤں سے پاک ہو جا (صرف اللہ تعالے ہی کی آرزو کر)۔

اس پرانے آسمان کی قیمت دو جو کے برابر بھی نہیں اس لیے (اپنے دل پر) نئی آرزو منقّش کر۔

آرزو پر ہی زندگی کی بنیاد ہے، اپنے آپ کو اپنی آرزو سے پہچان ( آرزو کی نوعیت ہی انسان کا مقام متعیّن کرتی ہے)۔

آرزو ہی سے آنکھ، کان اور فہم تیز ہوتے ہیں، آرزو ہی سے مشت خاک کے اندر گلہاۓ لالہ پیدا ہوتے ہیں۔

جس نے اپنے دل کے اندر آرزو کا بیج نہ بویا وہ سنگ و خشت کی طرح دوسروں کے پاؤں تلے روندا جاتا ہے۔

آرزو ہی سلطان و میر کا سرمایہ ہے اور یہی فقیر کے لیے جام جہان بین ہے۔

آرزو ہی مشت خاک کو آدم بناتی ہے، آرزو ہی ہمیں اپنے آپ سے آگاہ کرتی ہے۔

آرزو ہماری خاک سے شرر کی مانند بھڑکتی ہے اور اس ذرّے کو گردوں کی وسعت عطا کر دیتی ہے۔

آذر کے بیٹے ( خلیل اللہ) نے کعبہ تعمیر کیا اور ایک نگاہ سے خاک کو اکسیر بنا دیا۔

تو بھی اپنے بدن کے اندر خودی تعمیر کر اور اپنی مشت خاک کو اکسیر بنا دے ۔