مجھے دیدہء بینا سے اور (قسم کی) شکایت ہے، کہ جب تک جلوہ افروز ہوتا ہے تو میری نگاہ ہی حجاب بن جاتی ہے (دیکھنے کی تاب نہیں لا سکتی)۔

مجھ خاکی انسان کی طرف سے نوری فرشتوں کو پبغام دو، اس مشت خاک (آدم) سے ڈرنا چاہیے جو اپنے اوپر نگاہ رکھنے والی ہے۔

ہم گیت گاتے ہوئے بزم بہار میں جل رہے ہیں ، ہماری صبح کی فریاد ہی ہمارے پروں کے لیے شرر بن جاتی ہے۔

جو شخص اپنے آپ سے گریزاں ہو وہ کیا جانے کہ میری نوا کہاں سے ہے، اس کا جہان اور ہے، میرا جہان اور ہے۔

میں گل لالہ کی مانند (خوں شدہ) گوشہء چمن میں گرا پڑا ہوں، کیونکہ محبوب کے تیر نگاہ نے میرے جگر کو اپنا نشانہ بنایا ہے۔

زندہ دلوں کے مذہب میں زندگی مشکل پسندی (کا نام) ہے، میں نے کعبہ کا سفر (اس لیے) نہ کیا، کیونکہ راستہ میں کوئی خطرہ نہ تھا۔

یہ مسافر خانہ (دنیا) جو چاند کی قندیل سے روشن ہے، اس میں ہزار ہا انجمنیں آراستہ اور برخواست ہوئیں۔

اپنی خاک سےتعمیر کےلیے اٹھ کھڑا ہو، کیونکہ تجھےصرف اتنی ہی فرصت ہے جیسے شرر کی مسکراہٹ (چمک)۔

اگر تو بوالہوس نہیں تو میں تجھے ایک نکتہ بتاتا ہوں، کہ نالہ ہائے بے اثر سے عشق اور پختہ ہوتا ہے۔

میری نوا نے عجم میں پھر پرانی آگ (اسلام کی) روشن کر دی ہے، لیکن عرب ابھی تک میرے نغمہء شوق سے بے خبر ہے۔