اے باد صبا! میری طرف سے فرنگ کے دانا سے کہو ، جب سے (تمہاری ) عقل نے بال و پر کھولے ہیں، وہ اور زیادہ گرفتار ہے۔

یہ برق کو جگر پر لیتا ہے اور وہ اسے رام کرتی ہے؛ عشق ساحر کا پیشہ عقل سے زیادہ جگردار (حوصلہ مند) ہے۔

آنکھ ، سوائے گل و لالہ کے رنگ کے اور کچھ نہیں دیکھتی ، ورنہ جو کچھ رنگ کے پردہ میں ہے، وہ زیادہ ظاہر ہے۔

تعجب اس پر نہیں کہ تو اعجاز مسیحا رکھتا ہے، تعجب کی بات یہ ہے کہ تیرے (علاج سے) مریض کا مرض بڑھ گیا ہے۔

تو نے دانش تو جمع کر لی ، مگر دل کو ہاتھ سے چھوڑ دیا، افسوس! اس قیمتی سرمایہ پر جو تو نے ہار دیا۔

حکمت و فلسفہ ایسا کام ہے جو اتھاہ ہے، مگر اس مدرسہ میں عشق و محبت کے تھپیڑے نہیں۔

بالعموم یہ (فلسفہ) بیدار اشخاص کے دلوں کو غارت کرتا ہے، کون سا فتنہ ہے، جو اس کی چشم فتنہ زا میں نہیں۔

عقل کی ٹھنڈی آگ دل کو تڑپنا نہیں سیکھاتی ، نہ اس کے غمزہء پنہاں میں کوئی لطف ہے۔

(فلسفہ) جنگلوں اور پہاڑوں میں پھرا (در در کی خاک چھانی) مگر غزل (حقیقت) کو نہ پا سکا۔ (سارے) باغ کے چکر لگائے مگر گریبان میں ایک پھول نہیں۔

علاج یہ ہے کہ عشق سے مدد لیں ، اس کے سامنے سجدہ کریں اور اس سے مراد مانگیں۔

عقل نے جب اس پیچ در پیچ راہ میں قدم رکھا ، تو پانی میں شعلہ دوڑا دیا اور دنیا کو درہم برہم کر دیا۔

اس کی کیمیا سازی نے اڑتی ہوئی ریت کو سونا بنا دیا، مگر کسی دل سوختہ پر اکسیر نہ ڈالی کہ وہ کندن بن جائے۔

افسوس ! ہماری سادگی پر کہ ہم عقل کے فریب میں آ گئے ، حالانکہ وہ رہزن تھی، جس نے گھات لگا کر آدم کو راستہ میں لوٹ لیا۔

اس کے ہنر نے تہذیب فرنگ کی خاک اڑا دی، پھر وہ دھول ابن مریم کی آنکھ میں ڈال دی۔

شرر کاشت کر کے اس سے شعلہ حاصل کرنا کب تک؟ دل پر گرہ ڈالنا اور پھر اسے کھولنا کب تک؟

اپنے آپ کو دیکھنے والی عقل اور ہے، جہان پر نگاہ رکھنے والی عقل اور ہے، بلبل کے پر اور ہیں، شاہیں کا بازو اور ہے۔

زمین پر گرے ہوئے دانہ کو چننے والا اور (پرندہ) ہے، اور وہ (پرندہ) اور ہے جو دانہء پروین (ستارہ) سے خوراک حاصل کرتا ہے۔

وہ جو نسیم کی مانند ( اوپر ہی اوپر) باغ کی سیر کرتا ہے اور ہے، اور وہ جو گل و نسرین (پھولوں) کے اندر داخل ہو جائے، وہ اور ہے۔

نو پردوں (والے آسمان) کے دوسری طرف دیکھنا اور بات ہے، اور پردوں کے اس طرف ظن و تخمین (میں مبتلا رہنا) اور چیز ہے۔

اس عقل کی کیا بات ہے، جس کے ساتھ دونوں جہان کی وسعت ہے، جو فرشتے کا نور بھی رکھتی ہے اور آدم (علیہ) کا سوز دل بھی۔

ہم نے عشق کے خلوت کدہ سے نکل کر یلغار کی ہے، ہم وہ ہیں جنہوں نے پاؤں تلے روندی جانے والی خاک کو آئینہ کی مانند شفاف بنا دیا ہے۔

ہمارا حوصلہ دیکھیں کہ ہم نے ایک ہی داؤ و میں ، دونوں جہانوں کو جو ہم نے نہاں لیے تھے، کھلے بندوں ہار دیا ہے۔

سلسلہء شام و سحر ہمارے سامنے سے گزر رہا ہے، ہم نے (وقت کی) جوئے رواں کے کنارے خیمہ لگایا ہے۔

ہمارے دل نے اس دیر کہن (دنیا) پر شبخون مارا، ایک آگ تھی جو ہم نے خشک و تر میں لگا دی۔

ہم شعلہ تھے، ٹوٹے اور شرر بن گئے ، صاحب ذوق صاحب تمنا اور صاحب نظر بن گئے۔

(پھر) عشق، ہوس ہو گیا اور اس نے سارے بندھن توڑ دیے ، اور اس کے فتنے نے آدمی کو مچھلی کی مانند شکار کر لیا۔

اس نے بزم پر رزم (جنگ) کو پر تر جیح دی اور فوجیں تیار کیں ، مگر اس کی تلوار دوستوں ہی کے سر و سینہ پر برسی۔

اس نے جس رہزنی کی بنیاد ڈالی ، اسے جہانبانی کا نام دیا ۔ اس کی آقائی کے مظالم نے محکوموں کی کمر توڑ دی۔

(یہ ہوس پرست) کمزور عزیزوں کے خون سے پر جام ہاتھ میں لیے ، دف و نے (ساز) کی آواز پر بیدلی سے رقص کرتا ہے۔

وقت آ گیا ہے کہ کہ ہم نیا آئین بروئے کار لائیں ، دل کی تختی دھو ڈالیں اور اس پر از سر نو رقم کریں۔

پادشاہت کا تخت گیا اور لوٹ کھسوٹ کا شکار ہوا ، سکندری کا ساز اور دارائی کا گیت گایا ۔

فرہاد ہاتھ میں تیشہ لیے آیا اور حکومت پرویز کا مد‏عی ہوا، حکمرانی کی عشرت اور غلامی کی محنت کا دور گیا۔

یوسف کو قید خانہ سے نکال کر عہدہ امارت عطا ہوا، زلیخا کی ساری کہانی اور جادوگری (بیچ میں سے) نکل گئی۔

وہ راز جو پوشیدہ تھے ، بازار میں آ پڑے ، (ہر کسی کی زبان پر آ گئے) سخن سازی اور انجمن آرائی کا دور جاتا رہا۔

آنکھ کھول ، اگر تیری آنکھ صاحب نظر ہے (اور دیکھ کہ) زندگی کا ایک نیا جہان تعمیر کرنے کی فکر میں ہے۔

میں (دنیا کی) خاک کہن میں جان کا موتی دیکھ رہا ہوں (نئی زندگی کے اثار دیکھ رہا ہوں) مجھے ہر ذرّہ کی آنکھ ستارہ کی مانند دیکھتی ہوئی نظر آتی ہے۔

وہ دانہ جو ابھی زمین کے اندر ہے، میں اسے جوان، شاخ در شاخ اور پھلدار دیکھ رہا ہوں۔

(مغربی تہذیب کے) پہاڑ کو تنکے کی مانند ہلکا پاتا ہوں ، اور پر کاہ کو وزنی پہاڑ دیکھ رہا ہوں۔

وہ انقلاب جو آسمانوں کے ضمیر کے میں نہیں سماتا، میں اسے دیکھ رہا ہوں اور کوئی نہیں جانتا کہ کیسے دیکھ رہا ہوں۔

خوش نصیب ہے وہ شخص جو گرد میں (پنہاں) سوار دیکھ لیتا ہے، تار (ساز ) کے لرزنے سے نغمہ کا جوہر بھانپ جاتا ہے۔

زندگی بہتی ہوئی ندی ہے اور یہ ہمیشہ بہتی رہے گی، یہ پرانی شراب جوان (تیز) ہے اور جوان ہی رہے گی۔

جو تھا ، اور نہیں ہونا چاہیے تھا، وہ درمیان سے نکل جائے گا، اور جو ہونا چاہیے تھا اور نہیں ہوا، وہ ضرور ہو کے رہے گا۔

(ادھر) عشق (حسن ازل کے) دیدار کی لذت کے باعث سراپا نظر (انتظار میں ہے) ، (ادھر) حسن اظہار کا شوق رکھتا ہے اور وہ ضرور ظاہر ہو گا۔

وہ سرزمین جہاں میں نے اپنے خون آلودہ آنسو ٹپکائے ہیں، اس کے جگر میں میرے آنسو قیمتی لعل بن کے رہیں گے۔

'مجھے اس تاریک رات میں صبح کی خوشخبری دی گئی ہے، شمع بجھا دی گئی ہے اور (طلوع ہونے والے ) آفتاب کا نشان دکھا دیا گیا ہے'۔ (تہذیب فرنگ کی تباہی اور نئے دور اسلام کی آمد کی طرف اشارہ ہے)۔