شریعت میں کوئی اور معنی نہ ڈھونڈ؛ گوہر کے باطن میں بھی چمک کے سوا اور کچھ نہیں۔

شریعت ایسا موتی ہے جسے خود اللہ تعالے نے بنایا ہے؛ اس کا ظاہر بھی موتی ہے اور باطن بھی۔

سچا علم شریعت کے علاوہ اور کچھ نہیں اور سنت رسول پاک (صلعم) کی بنیاد محبت کے علاوہ اور کچھ نہیں۔

فرد کے لیے شرع ایمان کا زینہ ہے؛ اسی سے ایمان کے مقامات میں پختگی آتی ہے۔

ملّت کو بھی شریعت ہی سے نظام حاصل ہوتا ہے اور نظام محکم اسے دوام عطا کرتا ہے۔

شریعت کے علم ہی سے (عمل پر) قدرت حاصل ہوتی ہے؛ یہ ایسا ( قوت کا نشان ) اور ید بیضا (نور ہدایت) بھی۔

میں یہ کہتا ہوں کہ اسلام کا راز شرع ہے؛ شرع ہی آغاز اور شرع ہی انجام۔

تو جو دین کی حکمت کا امانتدار ہے میں تمہیں شرع مبین کا نکتہ بتاتا ہوں۔

اگر کوئی مسلمان کے مستحب ادا کرنے کے راستے میں بے سبب رکاوٹ بنے۔

تو مستحب کو فرض قرار دے دیا گیا ہے؛ گویا زندگی کو عین قدرت عمل قرار دیا گیا ہے۔

اگر جنگ کے دوران دشمن کا لشکر صلح کے گمان پر اپنے آپ کو بے خطر سمجھنا شروع کر دے۔

وہ سہل انگاری اختیار کر لے اور اپنے دفاعی انتظامات ختم کر دے۔

تو جب تک وہ دوبارہ اپنا نظام (دفاع) درست نہ کر لے اس کے ملک پر حملہ کرنا حرام ہے۔

کیا تجھے معلوم ہے کہ اللہ تعالے کے اس حکم کا راز کیا ہے، یہ کہ خطروں میں جینا ہی زندگی ہے۔

شرع یہ چاہتی ہے کہ جب تو جنگ کے لیے آئے تو شعلہ بن کر پتھر میں شگاف کر دے۔

شرع تیرے قوت بازو کو آزماتی ہے؛ تیرے سامنے (مشکلات ) کا پہاڑ رکھتی ہے۔

پھر کہتی ہے کہ اس پہاڑ کو ریزہ ریزہ کر دے؛ اپنے خنجر کی گرمی سے اسے پگھلا دے۔

کمزور اور لاغر بھیڑ ، شیر نر کے پنجہ کے لائق نہیں۔

جب باز ممولے کے شکار کا عادی ہو جائے؛ تو وہ اپنے شکار سے بھی زیادہ عاجز و خوار ہو جاتا ہے۔

جناب رسول اللہ (صلعم) نے جو خوب و زشت کے آئین شناس ہیں تیرے لیے شریعت کا یہ نسخہ جو تجھے عمل پر قدرت عطا کرتا ہے تحریر فرمایا۔

یہ عمل کے ذریعے تیرے اعصاب کو آہنی بناتا ہے اور تجھے دنیا میں بلند مقام عطا کرتا ہے۔

اگر تو کمزور ہے تو یہ تجھے استوار کر دیتا ہے اور پہاڑ کی مانند پختہ بنا دیتا ہے۔

حضور اکرم (صلعم) کا دین ہی دین فطرت ہے؛ اور شرع محمدی (صلعم) آئین حیات کی تفسیر ہے۔

اگر تو پست ہے تو یہ نسخہء شریعت تجھے آسمان جیسی بلندی عطا کرتا ہے؛ اللہ تعالے نے جو کچھ تمہیں کہا (کنتم خیرا لامۃ) تمہیں وہی بنا دیتا ہے۔

شریعت کا صیقل پتھر کو آئینہ بنا دیتا ہے ؛ اور لوہے کے دل سے زنگ دور کر دیتا ہے۔

جب حضور اکرم (صلعم) کا شعار (شریعت) ہاتھ سے نکل گیا تو قوم رمز بقا سے محروم ہو گئی۔

وہ شتر سوار صحرائی مسلمان جو درخت کی مانند سربلند و استوار تھا۔

وادیء بطحا میں رہائش پذیر تھا اور جس نے گرمیء صحرا سے تربیت پائی تھی۔

وہ باد عجم سے نے کی طرح کمزور ہو گیا۔

وہ جو شیر کو بکری کی طرح کمزور سمجھ کر مار دیتا تھا ؛ اب چیونٹی کے پاؤں تلے آ کر آہ و پکار کر دیتا ہے۔

جس کی تکبیر سے پتھر پانی ہو جاتے تھے اب وہ بلبل کی آواز سے گبھرا جاتا ہے۔

جس کا عزم پہاڑ کو تنکا سمجھتا تھا اب اس نے توکّل کے نام پر اپنے ہاتھ پاؤں باندھ لیے ہیں۔

جس کے ہاتھ کی ضرب دشمنوں کی گردن توڑ دیتی تھی؛ اب وہ سینہ کوبی سے اپنے قلب کو زخمی کر رہا ہے۔

جس کے نقش قدم سے سینکڑوں ہنگامے وابستہ تھے اب وہ گوشہء عجلت میں پاؤں توڑ کے بیٹھ گیا ہے۔

جس کا حکم دنیا پر چلتا تھا ، جس کے دروازے پر سکندر و دارا فقیروں کی مانند کھڑے رہتے تھے۔

اب اس نے اپنی کوشش کو قناعت کے سپرد کر دیا ہے؛ یہاں تک کہ وہ کشکول گدائی پر ناز کرتا ہے۔

شیخ احمد سرہندی (رحمتہ) جن کا آستانہ آسمان کی طرح بلند ہے آفتاب بھی ان کے نور سے کسب ضیا کرتا ہے۔

ان کے مزار پاک کو جو پھول ڈھانپے ہوئے ہیں وہ اس خاک سے لاالہ پڑھتے ہوئے اگتے ہیں۔

انہوں نے اپنے ایک مرید سے کہا کہ اے جان من! عجمی خیالات سے بچنا چاہیے۔

گو فکر عجم آسمان کی بلندیوں سے بھی آگے نکل گیا ہے؛ لیکن وہ دین نبی (صلعم) کی حدود سے بھی تجاوز کر گیا ہے۔

میرے بھائی ! اس نصیحت کو اچھی طرح سن اور ملت کے پاسبان (مجدد) کی اس بات کو حرز جان بنا لے۔

اپنے قلب کو اس قول راست سے مضبوط کر (عجمی خیالات چھوڑ کر) عربی اخلاق ستودہ اختیار کر تاکہ تو صیحح معنوں میں مسلمان بن جائے۔