اور ملت اسلامیہ کا مرکز بیت اللہ ہے۔

خیال کی طرح زندگی بھی ایک حالت پر برقرار نہیں رہتی ؛ ابھی وہ ایک جہت سے دامن بچا کر چلتی ہے کبھی دوسری جہت، کسی ایک جہت سے وابستہ نہیں رہتی۔

یہ جہان جو حال و مستقبل سے مرکب ہے اس میں زندگی کیسے عمل فرما ہوتی ہے، اس کا وقت کیسے ماضی اور مستقبل پیدا کرتا ہے؟

اگر تو نظر رکھتا ہے تو اپنے آپ پر نگاہ ڈال ، اے بے خبر تو بھی رم پیہم کے سوائے اور کچھ نہیں۔

زندگی اپنے باطن کے تب و تاب کی نمائش کے لیے اپنے شعلے کو اپنے دھوئیں کے پردے میں بند رکھتی ہے (کہ شعلے میں پوشیدہ ہے موج دود)۔

جب زندگی کی حرکت بظاہر پر سکون نظر آتی ہے؛ تو گویا اس کی موج آب گوہر بن جاتی ہے۔(گوہر میں خو ہوا اضطراب دریا کا – غالب)

پھر زندگی کی آتش نے دم سادھا تو لالے کا پھول بن کر شاخ سے باہر نکل آئی۔

تیری سوچ سست اور لنگڑی ہے ؛ اس نے پھول پر یہ تہمت لگائی کہ اس کا رنگ اڑ جاتا ہے (حالانکہ یہ زندگی کی مسلسل حرکت کا اظہار ہے)۔

زندگی ایسا پرندہ نہیں جو ہر وقت نشیمن میں بیٹھا رہے؛ وہ طائر رنگ ہے اور ہر لمحہ اپنے رنگ بدلتا رہتا ہے۔

زندگی کا پرندہ قفس میں ‏ عاجز بھی ہے اور آزاد بھی ہے ؛ وہ اپنی خوش نوائی کے ساتھ فریاد کناں بھی رہتا ہے۔

اس کے پروں سے ہر لمحہ پرواز کم ہوتی رہتی ہے، پھر وہ ہر دم اپنے کیے کا خود علاج بھی کرتا ہے۔

زندگی خود ہی اپنے معاملات میں مشکل پیدا کرتی ہے اور پھر اپنی دشواریوں کو آسان بھی بناتی ہے۔

حیات تیز رو اپنے پاؤں کو مٹی میں مقید کرتی ہے تاکہ اس کا ذوق خرام بالا ہو۔

اس کے سوز کے اندر بھی ساز چھپا ہوا ہے؛ اس کا ماضی اور مستقبل اس کے حال ہی کی پیداوار ہے۔

زندگی ہر لمحہ مشکلات پیدا بھی کرتی ہے اور انہیں آسان بھی بناتی ہے ؛ وہ ہر دم نئی چیز پیدا کرتی اور نیا انداز اختیار کرتی ہے۔

اگرچہ زندگی کا سراپا حرکت سے عبارت ہے لیکن جب یہ سینے میں قیام کرتی ہے تو سانس بن جاتی ہے۔

ممکنات کے دھاگوں کا جال اپنے اوپر تنتی رہتی ہے؛ کبھی گرہ کھا کر گھنڈی بن جاتی ہے۔

جب گرہ کے اندر دانہ برگ و بر پیدا کرتا ہے تو اپنی آنکھ کھولتا ہے اور شجر میں تبدیل ہو جاتا ہے۔

پھر وہ آب و گل سے اپنے لیے خلعت پیدا کرتا ہے اور ہاتھ پاؤں اور چشم و دل پیدا کرتا ہے۔

(اسی طرح) زندگی جب انسانی بدن میں خلوت آختیار کرتی ہے تو مختلف محفلیں وجود میں لے آتی ہے۔

قوموں کے قیام کا دستور بھی یہی ہے؛ مرکز ہی سے ان کے اندر جمیعت پیدا ہوتی ہے۔

دائرے کے لیے مرکز وہی حیثیت رکھتا ہے جو بدن کے لیے جان؛ دائرے کا محیط اس کے مرکز میں مضمر ہے۔

قوم کا ربط اور نظام مرکز سے وابستہ ہے؛ مرکز ہی سے اس کی زندگی کو دوام حاصل ہوتا ہے۔

ہماری (قومی زندگی کا) راز اور ہماری (توحید) کا راز دار بیت اللہ شریف ہے؛ ہمارا سوز بھی اسی سے ہے اور ہمارا ساز بھی اسی سے ہے۔

ہم اس کے سینے میں سانس کی طرح پرورش پاتے ہیں؛ وہ (ہماری) جان شیریں ہے اور ہم اس کا بدن۔

ہمارا باغ اس کی شبنم سے تر و تازہ ہے؛ ہماری کھیتی اس کے زمزم سے پانی حاصل کرتی ہے۔

آفتاب اس کے ذرّوں سے روشنی حاصل کرتا ہے اور اس کی فضا میں غوطہ زن رہتا ہے۔

اس کے دروازے (توحید) کی دلیل ہم ہیں ، حضرت ابراہیم (علیہ) کے براہین میں سے ہے (حضرت ابراہیم (علیہ) کی دعا کی طرف اشارہ ہے)۔

کعبہ ہی نے دنیا میں ہماری شان بلند کی ہے؛ نبی نے ہمارے وجود کو ذات قدیم سے ملا دیا ہے۔

اس کے طواف سے ملت بیضا میں یگانگت ہے؛ اس کی مثال قفس کے اندر صبح آفتاب کی سی ہے (کعبہ شریف آفتاب صبح کی مانند نور بکھیر رہا ہے اور ملت اسلامیہ نے اس نور کو مقید کر رکھا ہے)۔

اس کے تعلق سے ہماری کثرت وحدت ہے اور اس وحدت کے سبب ہماری پختگی ہے۔

تو حرم شریف کے ساتھ تعلق کی وجہ سے زندہ ہے؛ جب تک اس کا طواف کرتا رہے گا پائیندہ رہے گا۔

دنیا میں قوموں کی جان جمیعت حرم کا راز ہے۔

اے روشن ضمیر مسلمان امت موسی (علیہ) کے انجام سے عبرت حاصل کر۔

جب اس قوم نے مرکز چھوڑ دیا تو اس کی جمیعت کا رشتہ ٹوٹ گیا۔

وہ قوم جو رسولوں کی گود میں پلی تھی؛ جس کے افراد کل کے اسرار سے واقف تھے۔

زمانے نے اس کی کنپٹی پر تھپڑ مارا جس سے اس کی زندگی خون بن کر اس کی آنکھوں سے بہہ نکلی۔

اس کے انگور کی رگوں سے نمی جاتی رہی؛ اب اس کی خاک سے انگور تو درکنار بید مجنوں بھی پیدا نہیں ہوتا۔

بے وطنی کی وجہ سے وہ اپنی زبان بھی گم کر چکی ہے؛ وہ اپنی آواز بھی گم کر چکی ہے اور اپنا آشیانہ بھی۔

اس کی شمع بجھ چکی ہے اور اس پر پروانہ نوحہ خواں بنے؛ اس کی کہانی سے میرا بدن لرز اٹھتا ہے۔

اے مسلمان تو جو زمانے کی تیغ ستم سے زخمی ہے؛ تو جو تشکیک اور وہم و ظن کا اسیر ہے۔

جامہء احرام کو اپنا پیرہن بنا؛ اور اس طرح اپنی شام زوال کس غبار سے صبح پیدا کر لے۔

اپنے آبا و اجداد کی مانند سجدے کے اندر غرق ہو جا؛ سجدے میں اسی طرح گم ہو جا کہ یکسر سجدہ بن جا۔

دور اوّل کے مسلمان نے نیازمندی پیدا کی تھی تب اسے وہ ناز حاصل ہوا جو دنیا میں ایک انقلاب لے آیا۔

پہلے اس نے اللہ تعالے کی راہ میں اپنے پاؤں کو کانٹوں سے زخمی کیا تب اس نے اپنے گوشہء دستار میں گلستان سجایا۔