اے امت مسلمہ جس نے لا محدود سے جو نظر نہیں آتے پیمان وفا باندھا ہوا ہے اس طرح تو قید ساحل سے سیلاب کی مانند آزاد ہو چکی ہے۔

اس باغ (دنیا) سے شجر کی طرح اٹھ ، اپنے دل کا تعلق غائب سے استوار کر اور کائنات سے جو حاضر ہے مسلسل جد و جہد کر۔

وجود کائنات (حاضر ) غائب (صفات ذات) کا مظہر ہے اور کائنات کی تسخیر اللہ تعالے کی معرفت کا دیباچہ بن جاتی ہے۔

ماسوا صرف اس لیے ہے کہ اس کی تسخیر کی جائے اور اس کے سینہ کو انسانی جد و جہد کے تیر کا حدف بنایا جائے۔

اللہ تعالے کے کن کہنے سے ماسوا (کائنات) وجود میں آیا؛ تاکہ تیرے تیر کا پیکان آہرن کو چھوڑے۔

دھاگا گرہ در گرہ ہونا چاہئے تاکہ انہیں کھولنے میں زیادہ لطف آئے۔

اگر تو غنچہ ہے تو اپنے آپ کو چمن سے تعبیر کر؛ اگر تو شبنم ہے تو سور ج (کی گرمی سے اڑ جانے کی بجائے اس) کی تسخیر کر۔

اگر تو کوئی اچھا کام کر سکتا ہے تو وہ یہ ہے کہ اس شیر برف (کائنات) کو اپنے دم گرم سے پگھلا دے۔

جس نے محسوسات کو تسخیر کر لیا؛ وہ ایک ذرّہ سے جہاں تعمیر کر سکتا ہے۔

جس کے تیر نے فرشتوں (کو خلافت کا منصب عطا نہ کرکے، ان) کا سینہ زخمی کر دیا تھا۔اس نے آدم ہی کو اوّلیت دے کر اپنے فتراک میں باندھا تھا (اور اس کے لیے کائنات کی ہر شے مسخر کر دی تھی)۔

آدم ہی نے پہلے محسوسات کا عقدہ کھولا اور موجودات کی تسخیر سے اپنے ہمت کو آزمایا۔

کوہ و صحرا ، دشت و دریا، بحر و بر؛ ارباب نظر کے لیے تعلیم حاصل کرنے کا میدان ہیں۔

اے وہ شخص! جو افیون کی تاثیر سے سویا پڑا ہے؛ اور عالم اسباب (دنیا ) کو حقیر کہتا ہے۔

اٹھ اپنی خوابیدہ آنکھ کھول، اس عالم مجبور (کائنات) کو حقیر نہ کہہ۔

کائنات کا مقصد مسلمان کی شخصیت کی توسیع اور اس کے اندر جو ممکنات پوشیدہ ہیں؛ ان کا امتحان ہے۔

زمانہ تیرے بدن پر تلوار چلاتا ہے، تاکہ تو دیکھ لے کہ تیرے جسم میں خون موجود ہے۔

مگدر سے اپنا سینہ زخمی کر اور اپنی ہڈیوں کا امتحان لے۔

اللہ تعالے نے اس جہان کو نیکیوں کی میراث فرمایا ہے؛ اور اس کے جلوے بندہء مومن کی نگاہ کے لیے (وقف) رکھے ہیں۔

یہ جہان قافلہء حیات کا راہگذر اور مومن کی قوتوں کی آزمائش گاہ ہے۔

تو اس کو تسخیر کر، تا کہ تجھے تسخیر رہ کر لے؛ ایسا نہ ہو کہ وہ تجھے اپنے سبو کی مینا بنا لے۔

تیرے فکر کے گھوڑے کو طوطی کے پر لگے ہوئے ہیں ، اس کا قدم آسمان کی وسعتوں تک پہنچتا ہے۔

زندگی کی ضروریات اسے زمین پر رہتے ہوئے فلک پیما بنتی ہے۔

تاکہ اس نظام کائنات کی قوتوں کی تسخیر سے تیری ہنرمندیوں کی صلاحیتیں تکمیل پائیں۔

دنیا میں آدم اللہ تعالے کا نائب بنے اور عناصر فطرت پر اس کا حکم جاری ہو۔

اس طرح تیری محدود قوتیں جہان میں وسعت پائیں ؛ اور تیرے معاملات آراستگی حاصل کریں۔

تو ہوا کی پشت پر سواری کر؛ یعنی اس اونٹنی کو نکیل ڈال۔

سلسلہء کوہ کے خون سے اپنے ہاتھ رنگین کر اور دریا سے گوہر دار پانی کی نہر نکال۔

اس ایک فضا میں سینکڑوں جہان مخفی ہیں؛ ایک ایک ذرے میں کئی کئی خورشید پنہاں ہیں۔

ان آفتابوں کی شعاعوں سے نا معلوم کو دریافت کر؛ اور ایسے اسرار کو کھول جو ابھی تک انسان کے فہم سے بالا ہیں۔

خورشید عالمتاب سے اس کی توانائی لے ، اور پانی سے بجلی حاصل کر جو گھروں کو روشن کرے۔

آسمان کے سیّارے اور ستارے جنہیں پرانی اقوام نے اپنا معبود بنایا ہوا تھا۔

اے خواجہ یہ سب تیرے خدمتگار غلام اور کنیزیں ہیں۔

اپنی تحقیق کو پلاننگ سے مستحکم کر؛ اور انفس و آفاق کو مسخر کر لے۔

اپنی آنکھ کھول اور اشیاء کی ماہیت سمجھ؛ یعنی شراب میں چھپے ہوئے نشے کو دیکھ۔

تاکہ یہ ناتوں (انسان) اشیاء کی حکمت جان لے؛ اور کائنات کی قوتوں سے فائدہ اٹھائے۔

موجودات کی صورت کی تہ میں معنی پنہاں ہیں؛ اس پرانے ساز کائنات میں (ابھی تک) کئی نوائیں پوشیدہ ہیں۔

یہ ساز برق آہنگ ہے مگر صرف سمجھ دار ہی مضراب بن کر اس کے تاروں سے نغمے پیدا کر سکتے ہیں۔

تو کے خطاب کا مقصود ہے؛ پھر تو کیوں اندھوں کی طرح اس راہ پر چل رہا ہے۔

وہ قطرہ جو اپنے آپ کو روشن رکھنے کا راز جانتا ہے؛ وہ انگور میں شراب اور شاخ گل پر شبنم بن جاتا ہے۔

وہ دریا میں جاتا ہے تو موتی بن جاتا ہے اور اس کا جوہر ستارے کی طرح چمکنے لگ جاتا ہے۔

تو باد صبا کی طرح پھولوں کی ظاہری صورت پر نہ اترا؛ بلکہ باغ کے معنی کے اندر غوطہ زن ہو۔

جس نے اشیاء کائنات کی تسخیر کی اس نے برق و حرارت کو اپنی سواری بنایا۔

وہ حروف کو پرندوں کی سی پرواز عطا کرتا ہے؛ وہ ساز سے بغیر مضراب کے نغمے پیدا کرتا ہے۔

تیرا گدھا زندگی کی دشوار راہ دیکھ کر لنگڑانے لگا ہے؛ وہ ہنگامہء کشمکش حیات سے غافل ہے۔

تیرے ساتھی منزل تک پہنچ چکے ہیں؛ انہوں نے محمل کے اندر سے لیلی معنی کو پا لیا ہے۔

تو ابھی قیس کی طرح صحرا میں زخمی ، تھکا ہوا، بے چارہ اور آوارہ پھر رہا ہے۔

اشیاء کائنات کا علم حاصل کرنے سے ہی آدم کا وقار ہے؛ اور اشیاء کی حکمت جان لینے سے اس کا تحفّظ ہے۔