میں نے ایک رات سیدنا صدیق اکبر (رضی اللہ ) کو خواب میں دیکھا اور ان کے راستے کی خاک سے پھول چنے (ان کے ارشادات سے استفادہ کیا)۔

وہ جن کے احسانات ہمارے آقا (صلعم) پر سب لوگوں سے زیادہ تھے؛ وہ جو ہمارے طور سینا (اسلام کا نور ہدایت ) کے پہلے کلیم تھے۔

ان کی ہمت و کوشش نے ملّت کی کھیتی کے لیے ابر کا کام کیا؛ وہ جو اسلام غار ثور اور غزوہء بدر اور اب قبر میں بھی حضور (صلعم) کے ساتھ دوسرے ہیں۔

میں نے ان کی خدمت میں عرض کیا ، اے خاصہء خاصان عشق (رسول پاک صلعم) آپ کا عشق دیوان عشق کا مطلع ہے۔

ہمارے کار اسلام کی بنیاد آپ کے ہاتھ سے پختہ ہوئے؛ ہمارے دکھ کا کوئی علاج تجویز فرمایئے۔

انہوں نے فرمایا تو کب تک ہوس کا قیدی رہے گا؛ سورہ اخلاص سے حرارت اور چمک حاصل کر۔

یہ توحید کے اسرار کا ایک سر ّ ہے جو سینکڑوں سینوں میں ایک ہی سانس کی طرح آتا جاتا ہے۔

اللہ تعالے کا رنگ اپنا اسی کی مانند ہو جائے گا تو اس کے جمال کا عکس بن جائے گا۔

یہ جو اس نے تیرا نام مسلمان رکھا ہے اس سے تجھے ، کثرت سے وحدت کی جانب لایا گیا ہے۔

تو اپنے آپ کو ترک و افغان کہتا ہے، افسوس ہے تجھ پر تو جو تھا وہی رہا۔

امت مسلمہ کو ان ناموں سے چھٹکارا دلا؛ خم (اسلام) سے اپنی نسبت قائم رکھ، پیالوں پر نہ جا۔

تو جو ان ناموں میں پڑ کر رسوا ہو چکا ہے؛ تو درخت اسلام سے کچے پھل کی طرح گر چکا ہے۔

توحید کو اپنا اور کثرت کو خیر باد کہہ؛ اپنی وحدت کو ٹکڑے ٹکڑے نہ کر۔

اے توحید کے پر ستار اگر تو واقعی تو ہے تو کب تک دوئی کا سبق پڑھتا رہے گا۔

تو نے اپنا دروازہ اپنے اوپر بند کر لیا ہوا ہے؛ جو کچھ لب سے پڑھتا ہے (کلمہء توحید) اسے اپنے دل میں بھی اتار۔

تو نے ایک ملّت سے سینکڑوں ملتیں بنا لی ہیں؛ تو نے اپنے قلعہ پر خود ہی شبخون مار کے اسے تباہ و برباد کر دیا ہے۔

ایک ہو جا اور توحید کا عملی نمونہ پیش کر ؛ نظریہ ء توحید کو عمل سے وجود میں لا۔

عمل سے ایمان کی لذت بڑھ جاتی ہے؛ جو ایمان عمل میں نہ آئے مر جاتا ہے۔