فنا کو ہے جام کی شراب بنا دیا ، کس بیدردی سے اسے عام کر دیا۔

مرگ ناگہاں کی تماشہ گاہ کو، مہ و انجم کی دنیا کا نام دیا۔

اگر اس جہان کا ایک ذرّہ بھی (موت سے) بھاگنے کا انداز سیکھ لیتا ہے، تو اسے (فورا) افسون نگاہ سے اسیر کر لیتے ہیں۔

ہم سے ثبات کی کیا توقع رکھتا ہے، ہمیں تو گردش ایام کا اسیر بنایا گیا ہے۔

تیرے سینہ ء چاک کے اندر جو خودی ہے اس کا دھیان رکھ، یہی وہ ستارہ ہے جسے اس جہان کی شام فنا کا چراغ بنایا گیا ہے۔

یہ جہان گذر جانے والوں کا مقام ہے، اس سرائے مسافر ان میں عرفان کی بات یہ ہے کہ:

ہمارا دل باطل کی تلاش میں نہیں ، اور نہ ہمارا غم بغیر مقصود کے ہے۔

یہاں آرزو کا ، سرور ذوق اور شوق جستجو کا تحفظ کیا جاتا ہے۔

خودی کو لازوال بنایا جا سکتا ہے ، اور (ذات باری تعالے سے) فراق کو وصل میں تبدیل کیا جا سکتا ہے۔

خودی کے چراغ کو دم گرم سے روشن کیا جا سکتا ہے، اور اس کے سوزن سے گردوں (فنا) کا چاک سیا جا سکتا ہے۔

اللہ تعالے جو ہیں وہ ذوق سخن رکھتے ہیں، ان کی تجلّیات بغیر انجمن (پر لطف) نہیں۔ (اس لیے اللہ تعالے نے ایسے انسان پیدا کیے جن کی خودی پختہ ہو۔)

کس نے اس کے جلوہ و جمال کی برق کو اپنے جگر پر برداشت کیا، کس نے اس کے عشق کی شراب پی اور کون سارا پیالہ چڑھا گیا؟

کس کا دل حسن و خوبی کا معیار ٹھہرا ، اس کا چاند کس کی منزل کے طواف میں ہے؟

کس کی خلوت کے ناز سے الست کی آواز بلند ہوئی ، کس کے پردہء ساز سے بلی کی صدا اٹھی۔

عشق نے ہماری خاک میں کیا آگ روشن کر دی ، کہ ہماری ایک آواز (بلی) نے ہزاروں پردے جلا دیے ۔

اگر ہم ہیں تو جام ساقی کا دور بھی ہے، ہم ہیں تو اس کی بزم میں گرمی ء ہا و ہو بھی ہے۔

اس کی تنہائی پر میرا دل جلتا ہے، چنانچہ میں اس کی بزم آرائی کا سامان کرتا ہوں۔

میں اپنی خودی کو دانے کی مانند کاشت کرتا ہوں ، میں اس کی خاطر اپنی خودی کا تحفظ کرتا ہوں۔ ( تاکہ میری خودی پختہ ہو کر اس کی معرفت حاصل کر لے اور اس سے راز و نیاز کر سکے۔)