صبح کے وقت پھولوں کی ٹہنی پر بیٹھا ہوا ایک پرندہ ، دوسرے پرندوں سے کہہ رہا تھا:

'آدم کی اولاد کو پر و بال عطا نہیں ہوئے، اس سادہ منش کو زمین پر چلنے والا ہی بنایا گیا ہے'۔

میں نے اسے کہا: ' اے ہوا میں اڑنے والے پرندے، اگر میں تجھ سے سچی بات کہوں تو ناراض نہ ہونا۔

ہم نے ہوائی جہاز کو بال و پر بنا لیا ہے، اور (اس طرح) آسمان کی طرف اپنا راستہ نکال لیا ہے۔

ہمارا ہوائی جہاز کیا ہے؟ آسمان تک پہنچنے والا ایسا پرندہ جس کے پر فرشتوں سے بھی زیادہ تیز رفتار ہیں۔

اس میں شاہین کی پرواز اور عقاب کی قوّت ہے، لاہور سے فاریاب تک کا فاصلہ اس کی نظروں میں رہتا ہے'۔

فضا میں جوش و خروش سے چلتا ہے، جب نشیمن (ایر پورٹ) پر ہوتا ہے تو مچھلی کی طرح خاموش ہوتا ہے۔

گویا خرد نے پانی اور مٹی سے جبریل کی تخلیق کی ہے اور زمین سے آسمان تک لے جانے والا (رہبر) بنایا ہے۔

جب اس دانشمند پرندے نے میری بات سنی تو مجھ پر ایک دوستانہ نظر ڈالی۔

اپنے پروں کو چونچ سے کھجایا اور کہا کہ تو نے جو کچھ کہا ہے میں اس سے ناراض نہیں۔

مگر اے وہ جس کی نگاہ کیوں اور کتنا (دلائل اور کمی بیشی) پر ہے اور پست و بلند جس کے طلسم میں اسیر ہیں۔

کیا تو نے زمین کے معملات درست کر لیے ہیں کہ اب آسمان پر اڑنا شروع کر دیا ہے۔