پادشاہوں کی نوکری کرنے والوں کو یہ راز بتا دو، کہ نوائے دلگداز (شاعری) سے (بھی) دنیا کو فتح کیا جا سکتا ہے۔

اپنی متاع (پونجی) پر کیا ناز کرتا ہے، دردمندوں (اہل عشق) کے شہر میں ، غزنوی (جیسے پادشاہ) کا دل تبسم ایاز کی قیمت نہیں پاتا۔

پادشاہوں کا دل بھی گدائے بے نیاز سے لرزتا ہے، کیونکہ وہ بے نیازی میں ہمہ ناز ہے اور بے نوائی میں ہمہ ساز۔

میرے مقام کا کیا پوچھتا ہے، میں طلسم دل کا قیدی ہوں ، نہ میری پستی ، پستی ہے، نہ میری بلندی ، بلندی۔

عقلمندی کا راستہ چھوڑ ( یہ کہیں نہیں پہنچے گا) اللہ تعالے صرف نیاز مندی سے بھرپور دل اور پاکیزہ نگاہ (جو محبوبان مجازی سے پاک رہے) ہی سے پہنچا جا سکتا ہے۔

میں تیرے تغافل کے سبب خام اور تیری راہ میں نا تمام ہوں، (ادھر) میں ہوں اور میری جان نیم سوز (ادھر) تو ہے اور تیری چشم نیم باز۔

میں نے مندر کے راستہ میں اپنی جبین کے سجدوں سے پھولوں کی کیاریاں کھلا دی ہیں، کیونکہ میرا (اعجاز و) نیاز دو رکعت نماز میں نہیں سماتا۔

دوستوں کی کشمکش سے نیاز و ناز اٹھتے ہیں، میرا دل بہانہ سوز اور نگاہ بہانہ ساز (نگاہ محبوب کو دیکھنے کے لیے کوئی نہ کوئی بہانہ بنا لیتی ہے اور دل جو چاہتا ہے دلیرانہ کرتا ہے)۔