عقل کی کشمکش کا فریب دیکھنے سے تعلق رکھتا ہے ؛ ہے یہ امیر قافلہ مگر رہزنی کا ذوق رکھتی ہے۔ (زندگی کا مسئلہ سلجھانے کی بجائے اور الجھاتی ہے)

عقل جو ہزاروں حیلوں کی مالک ہے اس سے راستے کا پتہ نہ پوچھ؛ عشق کی طرف آ ، جو (عقل ذوفنوں کے مقابلے میں) یک فنی میں کمال رکھتا ہے۔

اگرچہ اہل فرنگ ستاروں سے باتیں کرتے ہیں ؛ مگر ان سے بچ کیونکہ ان کے انداز میں ساحری کا رنگ ہے۔

اس پرانی کارواں سرا (دنیا ) کی موت و حیات کے بارہ میں کیا پوچھتا ہے؛ یہاں کی زندگی گھٹ گھٹ کے مرنا ہے اور موت میں جان کنی۔

شہیدوں کے مزار پر ذرا اپنا گھوڑا کھینچ (رک جا) ہماری بے زبانی کی باتیں بھی سننے کے قابل ہیں۔

ایک بار پھر عرب کے صحرا میں خیمہ لگا کیونکہ عجم کی بزم میں ؛ بے اثر شراب اور ٹوٹا ہوا جام ہے۔

اقبال نہ شیخ شہر ہے، نہ شاعر خرقہ پوش؛ وہ صرف ایک فقیر راہ نشیں ہے، البتہ دل بے نیاز رکھتا ہے۔