تیری نظر ساری کی ساری خطا ہے اور تیری خرد کوتاہ، کلیم اللہ کے تقاضے (حسن ازل کے دیدار کی خواہش) کے بغیر تو کہیں نہیں پہنچ سکتا۔

اے سالک راہ! راستہ تاریک ہے تو اپنے اندر غوطہ زن ہو، مچھلی دریا کی تہ میں راستہ گم نہیں کر دیتی۔

مرد غیور پادشاہوں کے سامنے اپنی حاجت نہیں لے جاتا، کیا کرے ، پہاڑ تنکا نہیں بن سکتا۔

میرے نغمہء شوق کو نظر انداز نہ کر، کیونکہ تو اس میں درویشی کی رمز بھی پائے گا اور شہنشاہی کا سرمایہ بھی۔

اگر تو آہ سحر کی لذت سے آگاہ ہے، تو میرا نغمہ تجھ پر اسی طرح اثر انداز ہو گا جس طرح باد نسیم گل پر اثر انداز ہوتی ہے۔

اے آسمان! تیری آنکھ میں سختی اور خطر پسندی ہے، مجھے یوں نظر آتا ہے جیسے تو کسی نئے تماشے کا خواہاں ہے۔