اے وہ ذات ! جس نے میرے ذریعہ آہ و گریہ کی گرمی بڑھا دی ہے: میری صدا سے مسلمان میں، جو ایک ہزار سال سے خاک کا ڈھیر بن چکا ہے، زندگی کی نئی لہر دوڑا دے۔

آپ میرے دل کا کیا حال کریں گے؛ جب کہ آپ بدن کی مٹی کو زندگی کی شراب سے شوق مستی عطا فرما دیتے ہیں۔ ( بدن میں مستی ء شوق پیدا ہو جاتی ہے، تو دل کا کیا حال ہو گا، جو خاص طور سے اللہ تعالے کی محبت کے لیے بنایا گیا ہے) ۔

میری آواز سے مغموم کلی کے دل کی گرہ کھول دے ؛ گل لالہ کے اندر جو داغ ہے ، اسے میرے کلام کی باد نسیم سے پھر تازہ کر دے۔ (مسلمان کی افسردگی دور ہو اور اس کے اندر اللہ تعالے کی محبت کا داغ پھر سے تازہ ہو جائے۔)

میرا خیال بلند مہر و مہ و مشتری سے اوپر نکلے جا رہا ہے؛ آپ اس غزل کو شکار کر کے اپنا کیوں نہیں بنا لیتے۔

میرے مالک ! اپنے گدا کی آبرو کا خیال رکھ (اسے اپنے لطف سے نواز دے)؛ تیرا یہ گدا اتنا خوددار ہے کہ اس کے سامنے دوسروں کی ندیاں موجود تھیں مگر اس نے ان سے اپنا کاسہ ء گدائی نہیں بھرا۔