اگرچہ میں تاریک مٹی سے بنا ہوں ؛ مگر میرا دل میری متاع (خاص) ہے؛ اس کے سبب میں (حق تعالے کے) جمال کے نظارہ کے لیے ستارہ کی مانند بہ چشم وا بیٹھا ہوں (تو ذرا چھیڑ تو دے تشنہ ء مضراب ہے ساز)۔

میں اس لیے نالہ ء خاموش ہوں کہ آپ کے مضراب کا خواہاں ہوں؛ اور آپ سمجھتے ہیں کہ میں ایسا ساز ہوں جو راگ کے قابل نہیں رہا۔

میرے اندرون کو اس طرح کر دیں کہ اپنی نوا کے شعلہ سے خاکیوں کے دلوں میں موجود عشق کو گرما دوں اور نوریوں کے دلوں میں (عشق کا) گداز پیدا کر دوں۔

ہماری فطرت میں جو تب و تاب ہے؛ اس کا سبب ہماری نیازمندی ہے؛ آپ خدائے بے نیاز ہیں، آپ میرے سوز و ساز کو نہیں پا سکتے۔

میں نے اپنا راز (محبت) نہ کسی پر عیاں کیا اور نہ کسی سے چھپایا؛ صرف غزل کہی ، مگر اس انداز سے کہ میرا راز میرے سینے سے باہر آ گیا۔