اپنے چاند جیسے چہرے سے بند کھول دیجیے ؛ کفر و دین دونوں پر اپنی رحمت عام کی بارش کیجیے ( تاکہ دین میں اس بارش سے تر و تازگی پیدا ہو اور کفر اس سے ختم ہو جائے)۔

زمزمہ کہن (اسلام کے دور اوّل کا گیت) چھیڑئیے اور بزم میں پیمانے کی گردش تیز کر دیجیے ( بھر بھر کے پلائیے اور جلدی جلدی پلائیے) ؛ جام آتشیں لیے پھر ہماری بزم کی طرف التفات فرمائیے ۔

کندھے پر دام گیسو ڈالے باغ میں جانے کی کیا ضرورت ہے؛ آپ کے بام پر جو طائر بیٹھا ہے (اپنی طرف اشارہ ہے) اسے کیوں نہیں شکار کر لیتے۔

ریگ عراق منتظر ہے، حجاز کی سر زمین پیاسی ہے؛ اپنے کوفہ و شام کو پھر حسین (رضی اللہ ) سے شاداب کیجیے۔

عشق اپنی باگ ڈور کسی اور کے ہاتھ میں نہیں دیتا؛ وہ رہبر کو کندھا مار کے ایک طرف کر دیتا ہے اور اکیلا ہی راستہ طے کرتا ہے (عشق سمجھتا ہے کہ راہبر اس کا راستہ روکے کھڑا ہے)۔

میں دیر میں کھڑا خود رفتگی میں فریاد کر رہا ہوں ؛ کہ حرم تک پہنچنے کی راہ ملے اور وہاں میں اپنا مقام پہچان لوں۔

مجھے دیکھو میں (اسلام کے ) قافلہ ء بہار کی خبر دینے والا وہ پرندہ ہوں جس نے قفس کی تنہائی میں بھی اپنا پیغام سنا دیا ہے۔