دل اور آنکھ دونوں لذت نظارہ کے لیے بیتاب ہیں (مگر آپ کا نظارہ کر نہیں سکتے)؛ اس لیے اگر میں پتھر سے صنم تراشتا ہوں تو اس میں میرا کیا گناہ ہے (خوگر پیکر محسوس ہے انساں کی نظر)۔

آپ کا جلوہ نقاب میں چھپا ہوا ہے، کیونکہ آپ (کا حسن لطیف) نگاہ کی تاب نہیں لا سکتا ؛ اے میرے چاند ! اگر میں نالہ و فریاد نہ کروں تو کیا کروں۔

اگر آپ میرے کاروان سرائے میں تشریف لے آئیں تو کیا حرج ہے؛ میری معمولی متاع یہی چھوٹا سا دل ہے جو (آپ کے ہجر میں) پارہ پارہ ہو چکا ہے۔

میں اس لیے غزل کہتا ہوں کہ شاید غزل سے قرار آ جائے : مگر شعلہ کے اندر سے شرارہ نکل جائے تو بھی اس کی تپش کم نہیں ہوتی (یہی میرا حال ہے)۔

آپ نے مجھے جو دل زندہ عطا فرمایا ہے؛ اس کا حجاب میں رہنا مناصب نہیں؛ مجھے ایسی نگاہ بھی عطا ہو، جو سنگ خارہ کے اندر چھپے ہوئے شرارہ کو دیکھ سکے۔ (گویا دل زندہ وہ ہے جس کی تاثیر سے نگاہ چھپی ہوئی چیزیں دیکھ لے)۔ جو ہے پردوں میں پنہاں ، چشم بینا دیکھ لیتی ہے - اقبال۔

آپ نے میرے دل ہزار پارہ میں اپنا غم اس طرح سمو دیا ہے کہ دل کا ہر ٹکڑا اس سے سرور حاصل کرتا ہے۔

ملاح طوفانی سمندر میں وہ خطرہ محسوس نہیں کرتا ، جو عشق کو ساحل پر سلامتی سے بیٹھ رہنے میں نظر آتا ہے۔

میں جھوٹے خداؤں کے پاس سے اس بے نیازی اور باوقار انداز سے گذر گیا؛ جیسے مہ کامل ستاروں کے پاس سے گذر جاتا ہے۔