اگرچہ عقل کا شاہین فضا میں خوب اڑتا پھرتا ہے؛ مگر اس صحرا میں ایک ایسا تیر انداز موجود ہے جو اس کی تاک میں بیٹھا ہے (عشق کی طرف اشارہ ہے)۔

ایسی چیز تو ہے، جو الجھے ہوئے معاملات کی گرہ کھول دے اور یہ زمانہ پردازوں (عشق کے گیت گانے والوں) کے بس میں نہیں۔

بات کہنے کی استعداد ہے، تو بات سمجھنے والا کوئی نہیں، وہ بندہ کہاں جائے جس کے سینہ میں راز ہے۔

اگرچہ مجھے سو طرح سے سو طرح کے سوز میں جلایا گیا، مگر اس سوز کی لذّت کیسے بیان ہو، جو ساز بھی ہے۔

ہم خاک مردہ سے پیدا ہوئے ، اور دل زندہ کے سزاوار بن گئے؛ کہاں دل زندہ اور کہاں ہم! بس اللہ تعالے کا کرم ہے۔

میرے سینے کا شعلہ تو گھر روشن کرنے والا ہے؛ مگر ایسا شعلہ بھی ہوتا ہے، جو گھر پھونک دے۔

مجھے افلاطون کی عقل جہاں بیں پر بھروسہ نہیں ؛ کیونکہ میرے پہلو میں ایسا دل ہے جو شوخ اور نظر باز ہے (میری سوچ میں عشق کی جراءت اور گہرائی ہے)۔