یہ جہان کیا ہے؟ فقط میرے پندار کا صنم خانہ ہے؛ اس کا جلوہ صرف میری دید کا رہین منّت ہے۔

یہ سارا آفاق، جس کا احاطہ میں ایک نگاہ سے کر لیتا ہوں ، یہ گویا میری نگاہ کی گردش پرکار کا دائرہ ہے۔

اشیائے کائنات کا ہونا یا نہ ہونا میرے دیکھنے یا نہ دیکھنے پر موقوف ہے؛ زماں ہو یا مکاں؟ سب میری شوخیء افکار کے مرہون منت ہیں۔

اشیاء کا چلنا یا ٹھہرنا ، نظر آنا یا نہ آنا ، سب میرے فکر کی فسوں کاری ہے؛ یہ جہاں فقط میرے اسرار کا غمّاز اور انہیں افشا کرنے والا ہے۔

وہ جہان (آخرت) جس میں یہاں بوئے گئے اعمال کی فصل کاٹیں گے؛ اس (کی جنت) کا نور میری ہی تسبیح و زنّار (ایمان و کفر) کا اثر ہے۔

میں (انسان) ساز تقدیر ہوں ، اور میرے اندر سینکڑوں نغمے پنہاں ہیں؛ میرا تار وہاں تک پہنچتا ہے، جہاں تک میرے مضراب فکر کی رسائی ہے۔

اے وہ ذات، جس کے فیض سے میں پائیندہ ہوں! آپ کا نشان کہاں ہے؟ یہ دونوں جہان (دنیا اور آخرت) تو میرے اثر سے ہیں۔