آپ کو شاید خیال ہو کہ میں صرف آستانہ کی خواہش رکھتا ہوں؛ نہیں، طواف خانہ سے میرا مقصود صاحب خانہ ہے۔

میں ایسا شرر ہوں جس کا رنگ اڑا ہوا ہے مگر تو میرے جلوے کو نظر انداز نہ کر؛ ایک دو آن کی چمک کی بجائے میرے اندر تپش جاوداں ہے۔

جو راہ میں طے کر لیتا ہوں پھر اس کی طرف مڑ کر نہیں دیکھتا؛ زمانے کی طرح ہر روز نئی صبح کا متلاشی رہتا ہوں۔

دریائے عشق ہی میری کشتی ہے، دریائے عشق ہی میرا ساحل ہے؛ نہ مجھے سفینہ کا غم ہے اور نہ کنار ے کی خواہش۔

مجھ پر اپنی محبت کی چنگاری دلائیے مگر ایسی کہ مجھے بالکل ہی نہ جلا دے؛ میں نو نیاز عشق ہوں میرے اندر ابھی تک آشیانے سے وابستگی باقی ہے۔

اس امید پر کہ ایک روز آپ شکار کے لیے آئیں گے؛ میں شہریاروں کی کمندوں سے آہوانہ بھاگتا رہا۔

اگر آپ کرم فرمائیں تو میں اس معاشرہ کے لوگوں کو اس مے شبانہ سے جو میرے پاس ہے چند جام دلفروز بخش دوں (تاکہ ان کی مایوسی اور افسردگی دور ہو جائے )۔