عقل فلک پیما پر ترکوں کی مانند دلیرانہ شبخون مارنا چاہیئے ؛ درد دل (عشق) کا ایک ذرّہ افلاطون کے سارے علم سے بہتر ہے۔

کل مغبچہ نے مجھے اسرار محبت سے آگاہ کرتے ہوئے کہا؛ جو آنسو تو پی جائے، وہ شراب گلگوں سے بہتر ہیں۔

ایسا فقر جو تلوار کے بغیر دلوں کی صدہا مملکتیں فتح کر لیتا ہے، شوکت دارا اور فر فریدوں سے بہتر ہے۔

پیر مغاں کے دیر میںآئے تو بلند مضمون بات کہہ؛ قصّے کہانیوں کی باتیں صوفی کی خانقاہ میں اچھی لگتی ہیں۔

اگر ہماری جوئے رواں میں (از خود)، بغیر کسی طوفان کا ا حسان اٹھائے ایک موج بھی پیدا ہو جائے، تو وہ دریائے جیحوں سے بہتر ہے۔

(اقبال!) تو جو سیلاب (جنون) لایا ہے، یہ شہر میں نہیں سماتا، اس خانہ بر انداز طوفان کے لیے ویرانے کی خلوت بہتر ہے۔

اقبال غزل خواں کو کافر تو نہیں کہا جا سکتا، البتہ اس کے دماغ میں سودا ضرور ہے، اس لیے اسے مدرسے سے باہر ہی رکھنا چاہئیے (تاکہ وہ جوانوں کا دماغ خراب نہ کر دے)۔