یہ گئی گزری محفل جو بادہ و ساقی سے لطف اندوز ہونے کی صلاحیت کھو چکی ہے ، اس میں ایسا ندیم کہاں ملے گا جس کے جام میں میں اپنی شراب جاوداں ڈال سکوں۔

جو شخص جام زرّیں سے زہر شیریں پینے کا عادی ہو چکا ہے، وہ میرے مٹی کے پیالے سے ایسی کڑوی شراب کیسے پئے گا جو اس زہر کا تریاق ہے۔

میری خاک سے شرارے اٹھ رہے ہیں انہیں کہاں گراؤں ، کیسے جلاؤں؟ میری جان میں آپ نے محبت کا سوز بھر دیا، کیا کر دیا۔

مغرب نے علم و عرفان کے چشموں کو مکدر کر دیا ہے، ارسطو کے افکار ہوں یا افلاطون کے، وہ جہان کو تاریک تر بنا رہے ہیں۔

زمانے کے دل کے اندر سے فریاد اٹھ رہی ہے کہ مجھ میں زہر پھیل رہا ہے، اور خرد رو رہی ہے کہ اس کے پاس اس زہر کا کوئی مداوا نہیں۔

کیا ملّا ، کیا درویش ، کیا سلطان ، کیا دربان، سب خوشامد اور منافقت سے کاروبار کو فروغ دے رہے ہیں ۔

وہ بازار جس میں صرّاف بد نظر اور کم نظر ہے، میرا نگینہ جب چمک میں بڑھتا ہے تو اس کی نگاہ میں اس کی قیمت اور کم ہو جاتی ہے۔