اگر نظارہ ء جمال سے خود رفتگی پیدا ہو، تو حجاب ہی بہتر ہے ؛ مجھے ایسا سودا قبول نہیں یہ قیمت بہت زیادہ ہے۔

ہم سے سامنے آکر بات کریں ، کم آمیزی کے دن بیت گئے ؛ جب کہ دوسرے یہ کہتے تھے ، آپ ہم سے یہ چاہتے ہیں وہ چاہتے ہیں۔

ہماری نگاہ بے ادب نے آسمان میں رخنے ڈال دیے ہیں؛ اگر آپ کو حجاب ہے تو اور جہان بنا لیجیے۔

آپ اپنا اتنا خیال رکھتے ہیں کہ باوجود بے نیازی کے اپنے وجود پر دوستوں کے خون کی شہادت چاہتے ہیں۔

بندگی کا مقام اور ہے ، عاشقی کا مقام اور ہے؛ فرشتے سے آپ صرف سجدہ چاہتے ہیں ، لیکن خاکی سے اس سے زیادہ (یعنی شہادت) کے طلبگار ہیں۔

میرے پاس جو کچا تانبا (قلب) ہے، میں اسے آپ کی محبت سے کیمیا بنا رہا ہوں؛ کیونکہ کل (روز قیامت ) جب میں آپ کے سامنے پیش ہوں گا تو آپ فرمائیں گے: میرے لیے کیا تحفہ لائے ہو۔