میری نوا سے مجھ پر قیامت گزر گئی ہے؛ لیکن کسی کو خبر نہیں ؛ محفل صرف آواز کے زیر و بم اور مقام راہ ہی کو دیکھتی ہے۔

میری نہاد میں عشق کو فکر بلند کے ساتھ ملا دیا گیا ہے، میں ہمیشہ ناتمام ہوں ، چاند کی طرح نہیں ہوں کہ کبھی مکمل ہو جاؤں ، کبھی نا مکمل۔

فغان چھوڑ اور درد فراق کو اپنا لے؛ جب تک عشق آہ و فغاں میں مشغول رہتا ہے وہ اپنے جذب سے آگاہ نہیں ہو پاتا۔

ہر خس و خاشاک کو جو تمہارے سامنے آئے پھونک دے، خاک جب تک شعلہ نہ بنے وہ مقصد حیات کو پا نہیں سکتی۔

تو نر شاہین ہے پالتو پرندوں سے صحبت نہ رکھ ، اٹھ، پر پھیلا ، تیرے اندر پرواز کی طاقت موجود ہے۔

شاعر شبستان وجود میں جگنو کی مانند ہے، کبھی اس کے بال و پر میں چمک ہوتی ہے کبھی نہیں ہوتی۔

اقبال نے اپنی غزل میں خودی کے راز فاش کر دئے ، یہ کافر نو بتخانے کے آداب سے واقف نہیں۔