میں لالہء صحرا ہوں مجھے خیاباں سے لے جائیں، مجھے دشت و بیابان و کوہسار کی (آزاد ) ہوا میں لے جائیں۔

میں روباہی سیکھ کر اپنے آپ سے دور ہو چکا ہوں ، چارہ گرو! مجھے آغوش نیستاں میں لے جاؤ۔

میرے سینے میں ایک حرف تھا جسے میں بھول گیا ہوں، اگرچہ عمر رسیدہ ہوں مگر مجھے ملائے مکتب کے پاس لے چلو (غالبا قالو بلے کی طرف اشارہ ہے)۔

اگرچہ میں ساز خاموش ہوں مگر ابھی میرے اندر ایک اور نوا موجود ہے، مجھے ایسے شخص کے پاس لے چلیں جو میرے ساز پر سے پھر پردہ اٹھا دے ( پردہ موسیقی کی ایک اصطلاح ہے)۔

میری رات کے لیے میرے کہن داغ کا چراغ ہی کافی ہے، یہ چراغ جو زیر فانوس ہے اسے میرے شبستاں سے لے جائے (چراغ زیر فانوس غالبا عقل نو کو کہا ہے اور کہن داغ سے مراد اللہ تعالے کا عشق ہے)۔

میں جس نے غلاموں کو پادشاہی کے رموز سے آگاہ کر دیا ہے، میں تقصیر وار ہوں ، مجھے سلطان کے سامنے لے چلئے ۔