اگرچہ میں جانتا ہوں کہ مجھے ایک روز دیدار ذات میسّر آ جائے گا، مگر یہ نہ سمجھ کہ دیدار کے بعد مجھے قرار آ جائے گا۔

ضرب ایسی ہونی چاہئے جس سے جان خفتہ بدن کے اندر بیدار ہو جائے۔ مضراب کے بغیر تار رباب سے نالہ کیسے باہر آ سکتا ہے!

اپنی شاخ انگور کو گریہ ہائے نیم شب سے سیراب کر، تاکہ اس کے اندر سے شعاع آفتاب باہر نکلے (تاکہ اس کے اندر سے ایسی شعاع نکلے جو دلوں کو منوّر کر دے)۔

تو ذرّہ ء بے مایہ ہے مجھے ڈر ہے کہ کہیں تو مٹ نہ جائے ، اپنے آپ کو اور پختہ کر ، تاکہ تیرے اندر سے آفتاب طلوع ہو۔

خاک کو نظر انداز کر اور اپنے آپ کو پیکر خاکی نہ سمجھ، اگر تو اپنا سینہ چاک کرے تو اس کے اندر سے مہتاب نکلے گا۔

اگر انہوں نے تجھ پر اپنے حریم کا دروازہ بند کر دیا ہے، تو سنگ آستاں سے سر ٹکرا، قیمتی لعل باہر آجائے گا۔