میں غیّور گنہگار ہوں بغیر محنت کے مزدوری لینا پسند نہیں کرتا؛ (مجھے مفت کی جنت پسند نہیں ) ؛ مگر افسوس ہے کہ میرے گناہ کو ابلیس کی تقدیر سے وابستہ کر دیا ہے۔

عشق و مستی کے فیض سے میں نے اپنے فکر کو اس بلندی تک پہنچا دیا ہے، کہ اس کی روشنی کے سامنے مہر عالمتاب بھی ہیچ ہے۔

میں روز اوّل ہی سے موج گرداب کا متلاشی ہوں ، اگر میرا بحر حیات پر سکون ہو جائے تو میں خود طوفان کو آواز دیتا ہوں۔

میں اس سے پہلے جہان کو با ر ہا آتش شوق سے بیتاب کر چکا ہوں؛ میرے نغمے ایسے ہیں جو سکون و عافیت کو ختم کر دیتے ہیں۔

میں نے اس لیے زنّار باندھ کر بتوں کے سامنے رقص کیا ، تا کہ شیخ شہر مجھ پر کفر کا فتوی لگا کر مرد با خدا بن جائے۔

کبھی وہ مجھ سے بھاگتے ہیں کبھی مجھ سے مل جاتے ہیں، میں نہیں جانتا کہ اس صحرا میں میں شکاری ہوں یا شکار۔

بے سوز دل مردان با خدا کی صحبت سے کچھ حاصل نہیں کر پاتا، جب تک تانبا تپ نہ رہا ہو اس پر اکسیر اثر نہیں کرتی۔