میں نے شریعت کے احکام کی تحقیق کی ہے، اور اس نتیجے پر پہنچا ہوں کہ صرف منکر عشق ہی کافر زندیق ہے۔ (اور وہ جو ایمان والے ہیں ان کی اللہ تعالے سے محبت بہت شدید ہے: سورہ بقرہ)۔

خدا مسافران حرم کو یہ توفیق دے ، کہ آدم خاکی کا مقام پا لیں۔

میں راستہ نہیں پوچھتا، ساتھی ڈھونڈتا ہوں، کیونکہ کہتے ہیں کہ پہلے رفیق بعد میں طریق۔

یورپ کے فلاسفر اپنی کور ذوقی کی تلافی یوں کرتے ہیں ، کہ شراب کو سرخ جام میں ڈال کر اس کی رنگت بڑھاتے ہیں۔

وہ علم و دانش جس کی تصدیق دل نہ کرے ، اس سے جہالت ہزار گنہ بہتر ہے۔

اگرچہ عقل کی گتھیاں سلجھانے میں اور طرح کی لذت ہے، مگر سادہ دلوں کا یقین (ایمان) دقیق نکات سے ہزار درجہ بہتر ہے۔

میں نے علم کلام اور فلسفہ کو اپنے ذہن کی تختی سے دھو ڈالا ہے، اور اپنا ضمیر نشتر تحقیق کے لیے کھول دیا ہے۔

میں دربار سلطان سے کنارہ کش رہتا ہوں ، کافر نہیں ہوں کہ بے اختیار خدا کی پرستش کروں۔