پہلی بات تو یہ ہے کہ میں اپنے فکر کے بارے میں حیرت کدہ ہوں، وہ کیا چیز ہے جسے تفکر کہتے ہیں۔ کون سا فکر راہ (ہدایت ) پانے کے لیے ضروری ہے، یہ کیوں ہے کہ فکر کبھی اطاعت کی طرف لے جاتا ہے اور کبھی گناہ کی طرف۔

سینہء آدم کے اندر یہ کیا نور ہے، کہ اس کا غیب بھی حضور ہے۔

میں نے اسے جامد بھی دیکھا ہے اور متحرک بھی، مجھے اس میں نور بھی نظر آیا ہے اور نار بھی۔

کبھی برہان و دلیل اس کی نار بن جاتی ہے اور کبھی وہ وحی جبریل سے نور حاصل کرتا ہے۔

یہ کیا نور ہے جو جان کو چمکا دیتا ہے اور سینے میں گرمی پیدا کرتا ہے، اس کی ایک شعاع آفتاب سے بڑھ کر ہے۔

یہ فکر مکانی ہونے کے باوجود لامکان ہے، یہ روز و شب کے بندھن میں گرفتار ہونے کے باوجود ماورائے زماں ہے۔

فکر کی زندگی کا دار و مدار سانس کے آنے جانے پر نہیں، اس کی مانند کوئی اور جوئیندہ و یابندہ نہیں۔ ( فکر بلند مقاصد کی تلاش میں رہتا ہے اور ان تک پہنچتا ہے)

کبھی یہ تھک کر ساحل کو اپنا مقام بنا لیتا ہے اور کبھی دریا ئے بے پایاں کو اپنے جام میں لے لیتا ہے۔

یہ دریا بھی ہے اور عصائے موسی (علیہ) بھی، اسی سے سینہء دریا دو نیم ہوتا ہے۔

اس غزال کی چراگاہ آسمان ہے اور یہ جوئے کہکشاں سے پانی پیتا ہے۔

زمین و آسمان اس کے مقامات ہیں (منزل نہیں)، یہ کاروان حیات کے درمیان تنہا چلتا ہے۔

یہ جہان عظمت و نور (دنیا) ، (قیامت کی) صدائے صور ، ہر شے کا خاتمہ اور آخرت کی) جنت و حور یہ سب ہی کے احوال ہیں۔

اسی سے ابلیس و آدم کی نمود ہے، (اور) اسی سے ابلیس و آدم کے مسائل کا حل ہے۔

فکر کے جلوں کے باعث ہماری نگاہ صبر نا آشنا ہے، اس کی تجلّیات اللہ تعالے کو بھی آغوش میں لے لیتی ہے۔

فکر ایک آنکھ سے اپنی خلوت کو دیکھتا ہے، اور ایک آنکھ سے اپنی جلوت کو دیکھتا ہے (ہر شخص کے فکر کے دو پہلو ہیں ، اس سے وہ اپنے اندر کا جہان بھی دیکھتا ہے اور باہر کی دنیا بھی)۔

With one eye, it sees its own privacy, with the other eye; it looks at its apparent lustre.

یہ (جلوت میں ہو تو ) اپنی ندی سے سمندر پیدا کرتا ہے ، (اور خلوت میں ہو تو) اپنی گہرائی کے اندر بیٹھ کر اپنے آپ کو گوہر بنا لیتا ہے۔

پھر اسی وقت یہ ایک اور صورت اختیار کر لیتا ہے، اپنے اندر غوطہ زن ہو کر اپنے موتی کو باہر نکال لاتا ہے۔

اس کے اندر بے آواز ہنگامے ہیں ، اس کے رنگ بغیر چشم کے دیکھے جا سکتے ہیں، اور اس کی صدا بغیر کان کے سنی جا سکتی ہے۔

فکر کے شیشہ کے اندر ساری کائنات ہے، لیکن ہم پر اس کے راز بتدریج آشکار ہوتے ہیں۔

حیات فکر کی کمند پھینک کر، ہر پست و بالا کا شکار کرتی ہے۔

فکر کے ذریعے اپنے آپ کو اپنی گرفت میں لاتی ہے اور ما سوا کی گردن بھی دبوچ لیتی ہے۔

ایک روز دونوں جہان فکر کے شکار ہوں گے اور اس کی کمند تابدار میں آ جائیں گے۔

اگر تو ان دونوں جہانوں کو اپنی گرفت میں لے آئے ، پھر ساری کائنات کی موت سے بھی تو نہیں مرتا۔

بیابان طلب میں سست رفتاری سے نہ چل ، پہلے اس عالم کو قابو کر جو تیرے اندر ہے (عالم نفس)۔

اگر تو کمزور ہے تو تسخیر نفس سے زبر دست ہو جا، اگر تو اللہ تعالے کا قرب چاہتا ہے تو پہلے اپنے قریب ہو۔

اگر تو اپنی تسخیر میں کامیاب ہو جائے تو تیرے لیے تسخیر آفاق آسان ہو جائے گی۔

مبارک ہو گا وہ دن جب تو اس کائنات کی تسخیر کر لے اور ان نو آسمانوں کا سینہ چھید دے۔

پھر چاند تجھے سجدہ کرے گا، اور تو اپنی فکر کی موج درد سے کمند ڈال سکے گا۔

پھر تو اس دیر کہن میں خود مختار ہو گا، اور بتوں (مقاصد ) کو اپنی خواہش کے مطابق تراشے گا۔

پھر تو اس جہان کے چار سو کو (جو روشنی، آواز ، رنگ اور بو کا جہان ہے) اپنی مٹھی میں لے آئے گا۔

پھر تو اس کے زیادہ کو کم اور کم کو زیادہ کر سکے گا، اپنی مرضی کے مطابق اس میں تبدیلی لا سکے گا۔

اس کے نو جہانوں کے طلسم کو توڑنے کا مطلب یہ ہے کہ یہاں کے رنج و راحت سے دل نہ لگایا جائے۔

اس کے ضمیر میں تیر کی طرح اترا جائے ، اور اپنی گندم کو (قیمتی متاع) اس کے جو کے عوض نہ دیا جائے۔

بس یہی شکوہ ء خسروی ہے، یہی سلطنت ہے جو دین کے ساتھ جڑواں ہے۔