یہ کیا سمندر ہے علم جس کا ساحل ہے؟ اور اس کی تہ میں کون سا موتی حاصل ہوتا ہے؟

حیات انسانی بحر رواں ہے، اور شعور و آگاہی اس کا کنارا ہے۔

یہ دریا بہت گہرا ہے اور اس کی سطح پر کئی موجیں اٹھتی ہیں ، اس کے کنارے پر کئی ہزار کوہ و صحرا ہیں۔

اس کی بیقرار موجوں کی بات نہ کر ، ہر موج کنارے سے باہر نکلی پڑی ہے۔

موج بحر سے باہر نکل کر صحرا کو نمی عطا کر تی ہے، اسی سے نگاہ کو کیفیت اور کمیت کی لذت حاصل ہوتی ہے۔

جو چیز اس کے سامنے آتی ہے، وہ اس کے شعور سے فیضیاب اور منوّر ہو جاتی ہے۔

یہ اپنی خلوت میں مست ہے اور صحبت کو پسند نہیں کرتی ، اس کے باوجود ہر چیز اس کے نور سے منوّر ہے۔

پہلے اپنے نور سے اشیاء دکھاتی ہے ، بعد میں انہیں آئینہ سے مقیّد کر لیتی ہے۔

اس کے شعور نے اسے کائنات سے نزدیک کر دیا ، پھر جہان نے اسے اس کے راز کی خبر دی۔

خرد نے جہان کے چہرے سے نقاب ہٹایا، لیکن نطق نے اسے اور زیادہ عریاں کر دیا۔

حیات اس دیر مکافات (دنیا) میں نہیں سماتی، یہ جہان اس کے (سفر کے مختلف) مقامات میں سے ایک مقام ہے۔

تو اس جہان اور اس کے بیابانوں، دریاؤں ، صحراؤں ، سمندروں اور کانوں کو اپنے آپ سے باہر دیکھتا ہے۔

(نہیں) یہ جہان رنگ و بو تو ہمارا گلدستہ ہے، یہ ہم سے گزار بھی ہے اور ہم سے وابستہ بھی۔

خودی نے اس جہان کی اشیاء ، زمین و آسمان اور مہر و ماہ کو ایک تار نگاہ سے باندھ رکھا ہے۔

ہمارے دل کا اس جہان کے ساتھ پوشیدہ تعلق ہے، کیونکہ ہر موجود چاہتا ہے کہ کوئی اسے دیکھنے والا ہو۔

اگر کوئی اسے نہ دیکھے تو وہ غمزدہ ہوتا ہے، اگر اسے دیکھے تو پھر کوہ و صحرا بن جاتا ہے۔

ہمارے دیکھنے سے جہان کی افزونی ہے، اس کے درختوں کی نمو ہماری نمو سے ہے۔

ناظر و منظور کی بات ایک راز ہے، ہر ذرے کا دل یہ عرض کر رہا ہے۔

'اے شاہد! ' تو مجھے مشہود بنا ، اپنی ایک نظر کے فیض سے مجھے موجود بنا۔

کسی شے کی ذات کا کمال موجود ہونا ہے، یعنی کوئی شاہد اسے مشہود بنا دے۔

اور کسی شے کا زوال یہ ہے کہ وہ ہماری نظر میں نہ ہو اور ہمارے شعور سے منوّر نہ ہو۔

ہماری تجلّیات کے بغیر جہان کچھ نہیں ، ہمارے بغیر روشنی اور آواز کا کوئی اظہار نہیں۔

تو ابھی اس کی صحبت سے فائدہ اٹھا ، اور اس کے خم و پیچ سے اپنی نگاہ کی تربیت کر۔

'سمجھ لے کہ اس راہ میں شکاری شیر، چیونٹی سے بھی مدد لے لیتے ہیں'۔

تو اس کی دوستی سے خود آگاہی حاصل کر، تو جبریل امین (علیہ) (کی مانند تدبیر کائنات کرنے والا) بال و پر حاصل کر۔

چشم خرد سے کثرت کا تماشا کر تاکہ تو احد کا نظارہ کر سکے۔ ( کائنات پر غور و فکر سے معرفت الہی بھی حاصل ہوتی ہے اور انسان کی اپنی صلاحیتیں بھی اجاگر ہوتی ہیں۔)

پیرہن کی خوشبو سے اپنی حصّہ لے، کنعان میں رہتے ہوئے مصر سے آنے والی خوشبو پا لے۔ (جیسے یعقوب (علیہ) نے کنعان میں بیٹھے ہوئے کمیص یوسف (علیہ) کی خوشبو پا لی تھی۔ )

خودی شکاری ہے مہ و مہر اس کا شکار ہے، کائنات اس کی تدبیر کے بند میں اسیر ہے۔

تو آتش ہے ، اپنے آپ کو جہان میں ڈال ، (اور اس طرح) مکان و لا مکان پر شبخون مار۔