قدیم اور محدث ایک دوسرے سے کیسے جدا ہوئے، کہ محدث جہان بن گیا اور قدیم خدا رہا۔ اگر ذات پاک (اللہ تعالے) ہی معروف و عارف ہے تو پھر اس مشت خاک (انسان) کے سو میں کیا سودا (عشق ذات پاک) سمایا ہے۔

تخلیق ، خودی کی زندگی کا تقاضا ہے، عارف و معروف کا فرق خیر کا باعث ہے۔

جسے ہم قدیم اور محدث کہتے ہیں یہ ہمارے اعداد و شمار کا نتیجہ ہے، یہ ہمارے تصور زماں کا کرشمہ ہے۔

ہم ہر وقت گذشتہ اور آئیندہ کا شمار کرتے رہتے ہیں ، ہماری سوچ ماضی، حال اور مستقبل سے وابستہ ہے۔

اپنے آپ کو اللہ تعالے سے جدا رکھنا، تڑپنا اور (مقصود تک) نہ پہنچنا ہماری فطرت ہے۔

نہ اس کے فراق سے ہماری قدر و قیمت (کم ہوتی) ، نہ اسے ہمارے وصال کے بغیر چین ہے۔

نہ وہ ہمارے بغیر ، نہ ہم اس کے بغیر، یہ کیا صورت حال ہے؟ ہمارا فراق ، فراق اندر وصال ہے۔

جدائی آدم خاکی کو نگاہ عطا کرتی ہے، یہ تنکے کو پہاڑ کی سطوت عطا کرتی ہے۔

جدائی عشق پیدا کرنے کا سبب بنتی ہے، جدائی عاشقوں کو راس آتی ہے۔

اگر ہم زندہ ہیں تو (عشق کی) دردمندی کے سبب زندہ ہیں اور اسی کی وجہ سے ہميں پائیندگی حاصل ہے۔

'میں' اور 'وہ' کیا ہیں؟ اللہ تعالے کے اسرار ہیں، میرا اور اس کا الگ الگ وجود ہمارے دوام کا ثبوت ہے۔

خلوت اور جلوت دونوں جگہ ذات باری تعالے کا نور ہے، انجمن میں ہونا ہی زندگی ہے۔

انجمن کے بغیر محبت صاحب نظر نہیں ہو سکتی، نہ انجمن کے بغیر محبت اپنے آپ کو دیکھ سکتی ہے۔

ہماری بزم میں (اس کی) تجلیات ہیں، دیکھ! جہان موجود نہیں صرف وہی موجود ہے، دیکھ!

یہ در و دیوار ، یہ محل اور شہر نہیں ، یہاں اس کے اور ہمارے سوائے اور کچھ نہیں۔

کبھی وہ اپنے آپ کو ہم سے بیگانہ رکھتا ہے اور ہے کبھی ہمیں ساز کی طرح نوازتا ہے (ہمارے اندر سے نغمے پیدا کرتا ہے)۔

کبھی ہم پتھر سے اس کی تصویر تراشتے ہیں اور کبھی اسے دیکھے بغیر سجدے کرتے ہیں۔

کبھی ہم فطرت کے ہر پردے کو چاک کر دیتے ہیں اور دوست کے جمال کا بیباکانہ نظارہ کرتے ہیں ۔ (معراج کی طرف اشارہ ہے)

مشت خاک کے سر میں یہ کیا سودا سمایا ہے؟ اسی سودا سے تو اس کا اندرون روشن ہے۔

یہ کیسا پیارا سودا ہے کہ انسان اس کے فراق میں نالہ و فریاد بھی کرتا ہے، لیکن یہی فراق اسے ترقی کے مدارج بھی طے کراتا ہے۔

فراق نے اسے اتنا صاحب نظر کر دیا کہ اس نے اپنے (فراق ‍ کی) رات کو اپنے لیے سحر بنا لیا۔

(انسانی ) خودی کو (فراق کے) امتحان میں نہ ڈال کر دردمندی عطا کی۔ (اور اس طرح) اس کے غم کہنہ کو عیش جواں بنا دیا۔

اس نے اپنے چشم تر کے آنسوؤں سے موتیوں کی لڑیاں حاصل کیں، گویا 'نخل ماتم' سے میٹھا پھل پایا۔ ('نخل ماتم' محرم کے دنوں سے متعلق اصطلاح ہے)

خودی کو پوری طرح اپنا لینا ، گویا فنا کو اور بقا کو اکٹھا کر دینا ہے۔

محبت کیا ہے؟ مقامات کو اپنے قبضے میں کرنا۔ محبت کیا ہے؟ نہایات سے گذر جانا (محبت کی انتہا کوئی نہیں)۔

محبت میں اختتام کی بات نہیں ، اس کی روشن صبح کبھی شام میں تبدیل نہیں ہوتی۔

اگرچہ خرد کی طرح اس کی راہ میں (بھی) پیچ و خم ہے ، (مگر) اس کا جہان ایسی چمک سے (عبارت) ہے ، جو ایک دم ظاہر ہوتی ہے۔

ہمارے راستے میں کئی جہان آتے ہیں، ہماری کوشش کا میدان کبھی ختم نہیں ہو سکتا۔

مسافر (راہ عشق) بار بار فنا ہو اور ہر بار نئی زندگی پا، جو جہان تیرے سامنے آئے، اسے اپنے قبضے میں کر لے۔ (ایک جہان میں مرنا دوسرے جہان میں زندگی پانا ہے۔)

اللہ تعالے کے بحر میں گم ہو جانا ہمارا انجام نہیں ہے، اگر تو اسے اپنا لے ، تو پھر تیرے لیے فنا نہیں۔

خودی کا خودی میں سما جانا محال ہے، خودی کا اپنا آپ بنانا ہی اس کا کمال ہے ۔ (کہتا ہے کون وصل میں رہتا نہیں وجود ذات؛ قطرے کی بات اور ہے ، گوہر کی شان اور۔)