وہ 'جزو' کیا ہے جو کل (کائنات) سے بڑھ کر ہے؟ اور اس جزو کے پانے کا طریقہ کیا ہے؟

خودی ہمارے اندازے سے بھی بڑھ کر ہے، اور اس کل سے بھی (جسے) تو دیکھتا ہے۔

(یہ آسمانی چیز ہے اور) آسمان سے بار بار گرتی ہے تا کہ اٹھے ، یہ زمانے کے سمندر میں گرتی ہے تاکہ ابھرے۔

آسمان کے نیچے اس کے علاوہ اور کون خود نگر ہے؟ پر و بال کے بغیر اس کی طرح اور کون بلند پرواز ہے؟

یہ (بدن کی) ظلمت میں ہوتی ہوئی اپنی آغوش میں نور رکھتی ہے، یہ جنت سے باہر ہے، مگر حور اس کے پہلو میں ہے۔

دل لبھانے والی قوت گویائی کے باعث ، یہ دریائے زندگی کی تہ سے موتی نکال لاتی ہے۔

ضمیر حیات جاودانی ہے، اگرچہ ظاہر کی آنکھ سے دیکھا جائے تو یہ زمانی نظر آتا ہے۔

مقام ہست و بود (دنیا) میں رکھا جانا اس کی تقدیر ہے، اسی سے اس کی نمود (صلاحیتوں کا اظہار) ہے اور پھر یہ اپنی نمود کی حفاظت بھی کرتی ہے۔

تو کیا پوچھتا ہے کہ یہ کیسی ہے اور کیسی نہیں (خود اپنی تقدیر ہے)۔

یہ کیا ہے اور کیا نہیں ہے، میں اس کے بارے میں کیا کہوں؟ باہر سے یہ مجبور نظر آتی ہے مگر اندر سے مختار ہے۔

جناب رسول اکرم (صلعم) کا یہی فرمان ہے کہ 'ایمان جبر و قدر کے درمیان ہے'۔

تو ہر مخلوق کو مجبور کہتا ہے کیونکہ وہ نزد و دور (زمان و مکان ) کی اسیر ہے۔

مگر روح جو اللہ تعالے کی روح میں سے پھونکی ہوئی ہے، اور اپنے سارے مظاہر کے باوجود خلوت نشین ہے۔

اس کی مجبوری کا سوال ہی پیدا نہیں ہوتا، اگر روح اپنی فطرت کے لحاظ سے آزاد نہیں تو وہ روح ہی نہیں۔

اس نے کم و بیش کے جہان (دنیا) پر شبخون مارا ، اور اس طرح مجبوری (بدن میں ہونے) کے باوجود مختاری کی طرف قدم بڑھایا۔

جب اس نے اپنے آپ سے مجبوری کی گرد جھٹک دی ، تو پھر جہان پر سوار ہو کر اسے ناقہ کی طرح چلایا۔ ( ایّام کا مرکب نہیں، راکب ہے قلندر۔)

نہ آسمان اس کی اجازت کے بغیر گھومتا ہے ، اور نہ ستارہ اس کی توجہ کے بغیر چمکتا ہے۔

وہ زمانے کے پوشیدہ دن (آنے والے واقعات ) پر سے پردہ ہٹاتی ہے، اور اپنی نگاہ سے اس کے اندرون میں اتر جاتی ہے۔

نوری اس کے راستے میں قطار باندھے کھڑے ہوتے ہیں، اور اس کے دیدار کا انتظار کرتے ہیں۔

فرشتہ اس کے تاکستان سے شراب حاصل کرتا ہے، اور اس کی خاک کو اپنے لیے معیار ٹھہراتا ہے۔

تو اس کے طریق جستجو کے بارے میں پوچھتا ہے، عشق و مستی کے مقام میں آ (تاکہ تو اسے معلوم کر سکے)۔

اپنے شب و روز کو ابد کے مقابلے میں لا، اور فغان صبح گاہی سے اپنی عقل کی تربیت کر۔

خرد ہوس ظاہری سے سامان حاصل کرتی ہے، اور فغان عشق سے روشنی پاتی ہے۔

خرد 'جزو' کو اور عشق 'کل' کو گرفت میں لاتا ہے، خرد کو فنا ہے ، عشق کو ہرگز فنا نہیں۔

خرد کا ظرف اتنا نہیں کہ ابد کو سمجھ سکے ، وہ گھڑی کی سوئی کی طرح وقت کے شمار میں رہتی ہے۔

خرد دن، رات اور صبح تراشتی ہے، وہ شعلے کو نہیں پکڑتی ، شرر چنتی رہتی ہے۔

اہل عشق کا انجام کار فغاں ہے، فغاں کے ایک لمحے میں پورا زمانہ نہاں ہے۔

خودی کا مقصد اپنی ممکنات کا اظہار کرنا اور اپنے اندر کی گرہ کھولنا ہے۔

جس نور سے خودی دیکھتی ہے وہ تیرے پاس نہیں ہے ، یہی وجہ ہے کہ تو اسے فانی اور آنی (لمحاتی) سمجھتا ہے۔

آنے والی موت کا کیا ڈر ، خودی جب پختہ ہو جائے تو اسے موت کچھ نقصان نہیں پہنچا سکتی۔

(البتہ) میرا دل اس دوسری موت سے کانپتا ہے، دل ہی نہیں بلکہ جان اور بدن بھی۔

(یہ موت ان پر وارد ہوتی ہے) جو عشق و مستی سے نا آشنا رہتے ہیں ، جو اپنے (خس و ) خاشاک میں خودی کا شرر نہیں ڈالتے۔

یہ وہ لوگ ہیں جو اپنے ہاتھ سے اپنے اوپر کفن اوڑھ لیتے ہیں، اور موت کو آنکھوں سے دیکھتے ہوئے اس کا شکار ہوتے ہیں،

یہ موت ہر دم تیری گھات میں ہے، اس سے بچ کہ یہی اصل موت ہے۔

یہ موت بدن کے اندر تیری قبر کھودتی ہے، اس کے منکر نکیر تیرے پہلو میں ہیں۔