مسافر کیسا ہوتا ہے، راہرو کون ہے؟ مرد کامل کسے کہتے ہیں؟

اگر تو اپنے دل پر توجہ کرے تو تجھے اپنے سینہ میں اپنی منزل نظر آئے گی۔

یہی سفر اندر حضر ہے، یہی اپنے آپ سے، اپنے اندر سفر کرنا ہے۔ (پنجابی: عمر مک دیاں مک دیاں مک گئی اے، پینڈا یار دے در دا نئیں مک دا ۔ یار دل دے اندر وسدا اے ، سفر اپنے ای گھر دا نئیں مک دا)

اس اندرونی سفر میں کوئی نہیں جانتا کہ ہم کہاں ہیں ، کیونکہ ہم مہ و اختر کی آنکھ میں نہیں سماتے۔ (اس سفر کا اندازہ مہ و اختر سے نہیں ہو سکتا۔)

اپنی انتہا نہ ڈھونڈ ، کیونکہ تیری انتہا کوئی نہیں، انتہا تب ہو اگر تیرے اندر جان (روح) نہ ہو۔

اپنے آپ کو پختہ نہ سمجھ کہ ہم ابھی ناپختہ ہیں ، ہر منزل پر ہم مکمل بھی ہیں اور نا مکمل بھی۔

انتہا تک نہ پہنچنا ہی ہماری زندگی ہے، سفر ہی ہماری حیات جاوداں ہے۔

ماہی سے ماہ تک ہمارا میدان عمل ہے، مکان اور زمان دونوں ہماری راہ کی گرد ہیں۔

ہم اپنے اندر پیچ و تاب کھا رہے ہیں، اور اپنی شخصیت کے اظہار کے لیے بیتاب ہیں، ہم بحر وجود کی تہ سے اٹھتی ہوئی موج (بیقرار) ہیں۔

تو ہر وقت اپنی گھات میں رہ (اپنی حفاظت کر) اپنے آپ کو گمان سے بچا اور یقین کی طرف آ۔

جیسے عشق کی تب و تاب کو فنا نہیں (اسی طرح) ایمان و یقین اور نظارہء جمال کی بھی انتہا نہیں۔

کمال زندگی یہ ہے کہ ذات باری تعالے کا دیدار نصیب ہو، اور اس کا طریقہ مکان کی حدود (توڑ کر ان سے) باہر نکلنا ہے۔

ذات حق تعالے سے اس طرح خلوت حاصل ہو کہ تو انہیں دیکھے اور وہ تجھے۔

اپنے آپ کو ان (رسول پاک صلعم) کے نور سے منوّر کر جنہوں نے من یرانی فرمایا تھا، ان پر سے نظر ہٹا ورنہ تو خود باقی نہیں رہے گا۔

اللہ تعالے کے حضور اپنے آپ کو محکم رکھ ، اس کے نور کے بحر میں ناپید نہ ہو جا۔

تیری شخصیت کے ذرّے کو ایسا اضطراب نصیب ہو کہ وہ حریم آفتاب میں بھی چمکتا رہے۔

یار کی جلوہ گاہ میں اس طرح سوختہ ہو کہ ظاہر میں تو چمک اٹھے اور بباطن وہ چمک جائے۔

جس نے (حق تعالے کا جمال) دیکھ لیا، وہی جہان کا امام ہے، ہم سب نا تمام ہیں، اور وہ مکمل ہے۔

اگر تو ایسا رہنما نہ پائے ، تو اس کی تلاش میں نکل، اور اگر پا لے ، تو اس کے دامن سے وابستہ ہو جا۔

کسی فقیہ یا شیخ یا ملّا کے ہاتھ میں نہ دے ، مچھلی کی طرح کانٹے سے غافل نہ رہ۔

ایسا کامل شخص ہی دنیوی اور دینی معاملات میں صحیح راہ نما ہے، ہم سب اندھے ہیں اور وہ صاحب نگاہ ہے۔

آفتاب صبح کی مانند اس کے ہر بن و مو سے نگاہ پھوٹتی ہے۔

فرنگ نے جمہوری آئین کی بنیاد رکھ کر دیو کی گردن کو زنجیر سے آزاد کر دیا ہے۔

فرنگ بغیر مضراب اور ساز کے کوئی آواز نہیں رکھتا ، نہ وہ طیارے بغیر پرواز کر سکتا ہے۔ (قلب کی آواز اور روح کی پرواز سے محروم ہے۔)

اس کے باغ سے ویران کھیتی ، اور اس کے شہروں سے بیابان بہتر ہیں۔

اس کے کاروان کی کوشش رہزن کی طرح ہے، اور ان کے پیٹ روٹی کی دوڑ دھوپ میں لگے ہوئے ہیں۔

روح خوابیدہ ہے اور تن بیدار ہے، دین و دانش کے ساتھ اس کا ہنر بھی خوار ہو چکا ہے۔

اس کی خرد کافری اور کافر گری کے سوا اور کچھ نہیں، فرنگیوں کا فن (آرٹ) صرف آدمیوں کو چیرنا پھاڑنا ہے۔

ہر گروہ دوسرے گروہ کی گھات میں ہے ، اگر معاملہ یہی رہا ، تو پھر ان سے بھلائی کی کوئی امید نہ رکھ۔

میری طرف سے اہل مغرب کو یہ پیام دو کہ جمہوریت تیغ بے نیام ہے۔

یہ ایسی شمشیر ہے جو ہر ایک کی جان نکال لیتی ہے، اسے مسلم و کافر کی کوئی تمیز نہیں۔

یہ ایک لمحہ بھی نیام میں نہیں رہتی، اپنی جان بھی گنوا تی ہے اور جہان کی جان بھی۔